Colliar las attracziuns grischunas e colliar ellas cun trais differentas rutas – quai la finamira principala da Grischun Vacanazas. Il potenzial da giasts che veglia far ina tala tura saja tenor in studi tar sur 60% en Svizra, ha ditg Martin Vincenz il directur da Grischun Vacanzas. Ed era globalmain saja quai segment da turissem cuntinuadamain vida crescher e la furma da far ina tura saja la varianta preferida per emprender d’enconuscher ina regiun, uschia Grischun Vacanzas.
Profitar cun in'applicaziun
La plattafurma nova «go.graubünden.ch» duai porscher l’access nuncumplitgà a tut las purschidas. Quella applicaziun è vegnida elavurada en stretga collavuraziun cun la Viafier retica. Uschia survegnia il giast inputs e vegnia manà tar las attracziuns definidas, ma el possia er emprender d’enconuscher individual novas chaussas, uschia Martin Vincenz. Quai saja era la schanza per hotels ed ustarias pli pitschnas da sa posiziunar cun lur purschidas sin quella plattafurma ed uschia far part da la nov'applicaziun.
Daners da la nova politica regiunala
En tut vegn il project purtà da 11 destinaziuns, communabel cun la Viafier retica, il chantun Tessin e da l’uniun svizra dals albierts da giuventetgna. Il budget da quatter milliuns francs è in dals pli auts per in tal project fin qua da Grischun vacanzas. Il project fa part da la nova politica regiunal e vegn era sustegnì cun tals daners. Ultra da quai vegnan anc vitiers 12 partenaris che porschan agens products ed eveniments dal «Alpine Circle».