Damai ch'ins na possia betg sbassar ils auts custs per pajas e la cumpra da rauba, stoppian ins augmentar l'occupaziun. Da carmalar dapli turists en il Grischun saja realistic, sch'i reusseschia d'entusiasmar giasts dal lontan per la regiun, sco per exempel dals Stadis dal Golf, la China ed ils Stadis Unids, ha ditg Schmid.
Plaschair fetschia il svilup da l'onn passà, nua ch'ins haja registrà cun passa 5,1 milliuns pernottaziuns in plus da 5,7%. Quai saja positiv. Ins na dastgia dentant betg emblidar ch'ins saja lunsch davent dals buns resultats dals onns turistics 2007 e 2009.
Daners vegnan dal chantun
Sco il CEO da Grischun Vacanzas, Martin Vincenz, argumentescha è per il 2019 in mez milliun francs supplementars avant maun per promover la reclama en ils pajas surmar. Per ils onns 2020 e 2021 vegn mintgamai in milliun francs dal chantun supplementars per promover la reclama. Ma era ils martgads actuals ferms per il Grischun, sco l'Europa en general e la Svizra en spezial, na veglian ins en futur era betg negliger, ha ditg Martin Vincenz.
Confermà entira suprastanza
La sfida da pudair vegnir cun dapli giasts en il Grischun po Jürg Schmid prender enta maun cun la medema glieud. La radunanza generala da Grischun Vacanzas ha numnadamain reelegì l'entira suprastanza per ils proxims trais onns d'uffizi.
RR novitads 16:00