Suenter lunga discussiun e cun grond interess, surtut dad in public giuven, ha il Cussegl grond dà suatientscha a la regenza, che aveva proponì da declerar sco nunvalaivla l’iniziativa per mo ina lingua estra en scola primara.
Surtut per ils uffants rumantschs e talians dal chantun fissia questa iniziativa dischavantagiusa, perquai ch’els pudessian emprender englais pir davent dal stgalim superiur, uschia in dals arguments dals adversaris da l'iniziativa.
Ils iniziants han gia annunzià da trair enavant la decisiun dal Cussegl grond avant dretgira administrativa e sch'i stoppia esser schizunt fin avant la Dretgira federala.
Lia Rumantscha è cuntenta
La Lia Rumantscha sa mussa cuntenta cun la decisiun dal Cussegl grond da declerar nunvalaivla l'iniziativa per mo ina lingua estra en scola primara.
La problematica cun las linguas estras en scola primara na saja betg schliada, l’inegualitad dal tractament da scolaras e scolars rumantschs reguard l’instrucziun d’englais en scola primara dentant schon, scriva la Lia Rumantscha.
Nunvalaivel – betg l’emprima iniziativa cun quest destin
Quest onn ha il Cussegl grond gia declerà in’autra iniziativa sco nunvalaivla. La sessiun d’enviern ha quest destin gia tutgà l’iniziativa che vuleva abolir la chatscha speziala.
Tenor il professur dal dretg public Andreas Glaser na duess in parlament betg declerar nunvalaivel memia savens iniziativas. Dentant sin livel chantunal saja quai adina puspè il cas. Main savens succedia quai sin livel federal.
RTR novitads 20:00