La pli impurtanta midada è la limita d'onn per tut ils pestgaders: I n'è betg pli lubì da pestgar dapli che 60 peschs ad onn.
Questa midada ha chaschunà grondas discussiuns tranter ils pestgaders. Ils ins levan ina limita da 100 peschs l'onn, auters levan restrenscher la preda sin 50 peschs l'onn. Cun 60 hajan ins chattà in bun cumpromiss, manegia Marcel Michel, collavuratur scientific tar il chantun e responsabel per la pestga.
Ulteriuras midadas
- Ils dis cura ch'igl era scumandà da pigliar peschs (glindesdi, mesemna, venderdi) crodan. Danovamain pon ins ir set dis ad emna a pestga.
- Era pertutgant la lunghezza dal pesch vegni a dar midadas: I vegnian fixadas novas limitas minimalas e maximalas.
Tut en tut proponan l'Uffizi chantunal da pestga ed ils pestgaders grischuns 18 midadas.
Benedicziun da regenza anc necessaria l'atun
Las midadas èn vegnidas elavuradas en discussiun tranter l'uffizi chantunal da pestga e pestgaders en dus workshops. Da 100 ideas èn 18 vegnidas elegidas. Quellas n'èn dentant anc betg 100% definitivas: pir cura che la cumissiun da pestga e la regenza grischuna han confermà las midadas proponidas, van las midadas da las prescripziuns en vigur sin nivel chantunal. Ellas fissan alura in bun tant pli restrictivas che las leschas prescrittas da la Confederaziun.
Il salvament per la pestga grischuna?
Per il mument saja da restar realistic, manegia Adrian Arquint. Cunquai ch'il squitsch sin las auas en il chantun è uschiglio fitg grond na possian las novas prescripziuns betg midar tut. I saja dentant ina nova chaussa en favur da la pestga. Plinavant duaja la pestga restar attractiva. Arquint spera che las cifras sa stabiliseschan dentant ils proxims onns e ch'insaquants flums ed auals vegnan da sa recrear. Ina regeneraziun grossomodo vegnia dentant a duvrar decennis.
RR actualitad 11:00