Elegì è el vegni l'onn 1999, da ses temp anc sco commember dal PPS. En il parlament a Berna è il pur da Donat dà en egl oravant tut cun ses engaschament per l'agricultura - era en sia funcziun dubla sco president da l'Uniun grischuna purila.
In da ses pli gronds success saja stada la «Politica agrara 2014-2017», cun la quala ils pajaments directs per ils purs èn vegnids augmentads.
In grond tagl en la carriera politica da Hansjörg Hassler è stà l'onn 2007. Empè da Christoph Blocher è vegnida elegida Eveline Widmer-Schlumpf. Per consequenza è la PPS grischuna vegnida exclusa da la PPS svizra. Hansjörg Hassler era entamez ils eveniments. Il resultat è stà la furmaziun dal PBD – in nov dachasa politic per Hansjörg Hassler. Ma era tant dapli lavur.
Quest’ultima legislatura, dal 2011 fin il matg da quest onn, ha el gì la funcziun da president da fracziun. Uss èsi però a fin cun Berna, ed il politicher guarda enavant sin in futur sper las tribunas politicas per la paja danovamain dapli en stalla.