A chaschun da las elecziuns federalas dals 18 d’october 2015 era Heinz Brand vegnì reelegì sco cusseglier naziunal per il Grischun.
Brand e la migraziun
Sco la PPS Grischun scriva, haja Brand (60) ina grond'experientscha en il champ da la migraziun. Quai pervi da sia lavur sco schef da la polizia d'esters dal chantun Grischun. Or da questa raschun saja el era in spezialist per la migraziun, per esters e per asil en il Cussegl naziunal.
Brand e la sanadad
Er en ils champs da la sanadad e tgira haja Heinz Brand in’invista profunda. Il candidat è actualmain president da l’uniun da las cassas da malsauns «Santésuisse». Ed en il Grischun è el durant blers onns stà president da la «Flurystiftung Gesundheitsvorsorge».
Ultra da quai haja Brand en si’emprima legislatura en il Cussegl naziunal mussà sias abilitads davart la direcziun da dossiers, scriva la partida.
Schebain el va la finala en la cursa sco candidat uffizial per l'elecziun dals 9 da december, decida la fracziun da la PPS en Chasa federala l'emna che vegn
Brand abitescha a Claustra, è maridà ed è bab d’ina figlia creschida.
Ulteriurs candidats per il Cussegl federal
La gievgia han er autras partidas chantunalas dà enconuschent lur candidats:
- La PPS dal chantun Zug ha nominà ses Cusseglier naziunal Thomas Aeschi en la cursa per il sez en il Cussegl federal. Aeschi ha 36 onns ed è il president da la PPS da Zug.
- La PPS da la Sutsilvania ha communitgà ch'ella proponia il cusseglier guvernativ Res Schmid sco candidat.
RR novidats 14:00 / 17:00
