Siglir tar il cuntegn

Header

Heinz Brand.
Legenda: Sch’il Cusseglier naziunal da la PPS vul insumma daventar Cusseglier federal n’è betg anc cler. Keystone
cuntegn

Chantun Heinz Brand e sia reputaziun sco «hardliner»

Vegn in Grischun puspè Cusseglier federal suenter che Eveline Widmer-Schlumpf chala? Las schanzas èn en mintga cas intactas cun il Cusseglier naziunal da la PPS, Heinz Brand. Dentant vul el propi e fiss el era il dretg per quest post?

En il decurs da quest suentermezdi vegn sia partida a communitgar, sche Heinz Brand è da principi insumma pront da candidar ils 9 da december per il Cussegl federal.

Ch’el fiss en mintga cas adattà per quest post, gliez crain blers, era d’autras partidas. Uschia per exempel il liberaldemocrat dal Partenz, Christian Kasper, ch’enconuscha el per l’ina da la fundaziun Flury, nua ch'el Kasper ha surpiglià il presidi da Brand, ed era politicamain e privat hajan els gì inqual giada da far in cun l'auter ils ultims 5 onns.

Heinz Brand saja in um avert, ch'haja perseveranza e che sappia dentant era sa metter atras. Quai na muntia dentant betg, che Brand saja in stinà: «El ha quai ch’ins sto avair en la politica. El ha ina lingia e na dat era betg adina suenter, pia nagina bandiera en il vent.»

In «hardliners», sco quai ch’i vegnia ditg e scrit en las medias, gliez maletg n’haja el betg da ses bun collega: «Natiralmain è el dir en sia posiziun, dentant el è era pronts per cumpromiss ed averts per schliaziuns», concluda Christian Kasper. «E sch’ins ha ina buna idea, lura lai el era persvader da quella.»

Heinz Brand na saja betg quel da las grondas caneras che clomia ora, sco auters exponents da sia partida. El saja in che lavuria fitg conscienzius, dentant era in cun il qual ins possia rir fitg bain, cun il qual ins possia dar piztgadas – ditg simpel: in «da nus». Pia in dal Partenz, uschia ses facit.

Dapli da Grischunavrir la Landingpage

Nach links scrollen Nach rechts scrollen