Siglir tar il cuntegn
Inhalt

Chantun Hotel avert l'entir atun – betg per tuts in'opziun

En diversas destinaziuns grondas han gia uss plirs hotels avert l'entir atun. Igl è però adina be ina pitschna part da tut quels che han era avert durant la stagiun auta. Qua vesan hoteliers sco destinaziuns anc potenzial, ma per las destinaziuns pli pitschnas n'è quai betg exnum il cas.

plantas cun feglia melna d'atun
Legenda: Era in atun dad aur na munta betg exnum ch'i renda per in hotelier da lavurar atras gist fin la stagiun d'enviern. Keystone

A Lai èn 6 da 29 hotels sa decidids da laschar avert l'entir atun. In da quels è il Schweizerhof ch'è gia dapi onns sur onn avert. Per els funcziunescha quai: Blers giasts vegnian gugent siador da la Bassa ina fin d'emna per sa revegnir avant ils dis da festa u per scappar da la tschajera, uschia il directur Andreas Züllig. Ensemen cun ina purschida da wellness ed in temp cura che las pendicularas èn avertas per ir a viagiar, va il quint si per il Schweizerhof. Il directur agiunta però che quai na giess betg dad offrir per l'entir chantun uschia ina purschida.

Regiun è decisiva

Lai ha tenor Andreas Züllig il grond avantatg che la destinaziun è be in'ura e mesa davent da Turitg. Cumpareglià cun l'Engiadina nua ch'il viadi cuzza magari bunamain il dubel. Uschia ch'il viadi per in u dus dis a Lai rendia fertant che quel en l'Engiadina rendia strusch, uschia Züllig.

Che l'argument da la regiun e la purschida per il giast saja decisiv conferma er il manader da communicaziun da la regiun Tavau/Claustra. Là èn cun 370 letgs er gia ina pitschna part dals hotels averts sur onn.

Dapli purschidas ch'i ha per il giast potenzial e pli attractiv ch'igl è per el da vegnir en ina destinaziun. E sche las purschidas s'augmentassan en la tranterstagiun avessi qua segir anc spazi ensi.
Autur: Samuel Rosenastmanader communicaziun, destinaziun Tavau/Claustra

Quai munta però er che auters partenaris sper ils hotels ston sa participar e prolungar lur purschida, p. ex. pendicularas u center da sport u er il bogn cuvert. Tar la destinaziun Tavau/Claustra beneventassan ins sche dapli hotels avessan avert l'entir atun. Ch'i avess potenzial per tegnair avert tuts na vesan ins però betg.

«Er persunal dovra in zic ruaus»

Rolf Gubler che maina il pitschen hotel Al Rom a Tschierv en la Val Müstair è sa decidì da serrar ses hotel. Tenor el na saja la Val Müstair sin 1'600 m. s. m. betg ina destinaziun da vacanzas per il november. Lura n'hajan els nagins giasts. Suenter ina buna stad dovrian els ed er il persunal in zic ruaus.

La finala è la decisiun da laschar avert il hotel u da serrar el d'atun, ina che mintga hotelier sto prender per sa sez.

RR actualitad 17:00