La branscha da gastronomia e hotellaria grischuna è optimistica pertutgant la stagiun da stad. Fin uss sajan bunamain 40% da las chombras reservadas il fanadur e l'avust, quai mussa ina retschertga. Quei rapporta la gasetta Südostschweiz.
Singuls hotels inditgeschan en la retschertga da Hotelleriesuisse e da l'Uffizi per economia e turissem ch'els sajan schizunt occupads per 80% durant quels dus mais. Quai che dettia en egl saja ch'ils osps svizzers reservian pli ditg che uschiglio, di Marc Tischhauser, il manader da fatschenta da Gastro Grischun envers la gasetta Südostschweiz.
Il giasts restan pli ditg
10 dis fin duas jamnas sajan uschiglio plitost l'excepziun. Era il manader da fatschenta da hotelleriesuisse Grischun, Jürg Domenig, conferma il trend da segiurns pli lungs. Tenor la retschertga datti dentant immensas differenzas regiunalas. Grond interess dettia per ils manaschis en las regiuns muntagnardas.
Paucas reservaziuns per il fanadur hajan il mument Cuira e conturn sco era parts da l'Engiadina. Pervia da las restricziuns da corona na possian ils hotels betg porscher lur capacitads cumplainas. Uschia quintan blers hoteliers cun radund in terz damain pernottaziuns durant la stad 2020.
