Els hajan blers giasts en l'Engiadin'Ota, ha ditg Roberto Rivola il pledader da l'organisaziun turistica. Il trend positiv suenter las bunas cifras dal matg e dal zercladur sa mussia uss cleramain, cura ch'ins giaja giuador. Ina constataziun ch'era las destinaziuns Scuol, Samignun, Val Müstair ed er l'Arena Alva a Flem, Laax e Falera han confermà.
Il Rocksresort a Laax po nudar radund 10% dapli giasts cumpareglià cun la stad 2016. Ma er destinaziuns pitschnas sco la Viamala èn cuntentas cun il dumber da giasts. Ils hotels sajan occupads detg bain.
Dapli giasts svizzers – ma era dapli giasts internaziunals
Malgrà ch'els sajan fitg internaziunals e promovian la destinaziun en 17 differents pajais, dettia cunzunt en egl ch'els hajan dapli giasts svizzers, uschia Roberto Rivola da la destinaziun Engiadin'Ota San Murezzan. Ed er la pledadra da l'Arena Alva Larissa Lärchi ha ditg ch'i haja dapli giasts svizzers, sper Tudestgs era tals ord da stadis arabs.
En la destinaziun pitschna Viamala ha la mainafatschenta Denise Dillier constatà ch'i vegnia er adina dapli giasts internaziunals. Tenor ella tranter auter pervi da las plattafurmas per cudeschar vacanzas online. Uschia possian er hotels pitschens sa preschentar ad in public internaziunal.
Ils giasts vegnan pli spontan
Tut las destinaziuns dumandadas han menziunà ch'i dettia adina dapli giasts spontans. Motiv principal per quest svilup è tenor ils turistichers, che blers decidan spontan tenor la previsiun da l'aura.
Acziuns da marketing spezialas per attrair ina gruppa specifica da giasts, n'han naginas da las destinaziuns dumandadas fatg per la stad 2017.
RR actualitad 07:00