Siglir tar il cuntegn

Header

Navigaziun

cuntegn

Chantun I dat anc dapli naiv

Suenter ch'igl ha dà cunzunt en il Partenz fin 60 centimeters naiv ils davos trais dis, vegn davent da sonda saira gia la proxima chargia. Er questa giada è tenor SRF Meteo cunzunt il nord dal Grischun pertutgà.

Plantas pachetadas en naiv
Legenda: Suenter la naiv da quest'emna annunzià SRF Meteo per dumengia e glindesdi in'ulteriura chargia naiv. RTR, Selina Chistell

La blera naiv hai dà ils davos trais dis en il Partenz - numnadamain fin 60 centimeters. En las autras regiuns hai be dà tranter 5 e 30 centimeters, uschia Christoph Siegrist da SRF Meteo. E precis en quellas regiuns, nua ch'igl ha gia dà blera naiv quinta il meteorolog davent da sonda saira puspè cun blera naiv.

Blera naiv en il Partenz

Passa in meter naiv nova po quai dar en la regiun da cunfin tranter il Partenz e l'Austria. En Surselva dettia quai probabel puspè plitost pauca naiv. Cunquai che la naiv vegnia dal nord, saja bun pussaivel, ch'ella na vegnia betg sur ils culms e ch'ella crodia puspè per gronda part en ils chantuns Glaruna ed Uri. Er en l'Engiadin'Ota na saja betg da quintar cun blera naiv.

Plievgia en ils bass

La notg da sonda sin dumengia saja anc da quintar cun naiv. Uschia ch'i dettia per exempel a Cuira circa 10 fin 30 centimeters naiv. En las vals sin circa 1'500 meters sur mar saja dentant da quintar cun 30 fin 50 centimeters naiv. Ed eba cunzunt en il Partenz ed en il Scanvetg er dapli. Cunzunt là po la situaziun er daventar critica, i saja en scadin cas da tegnair en egl la situaziun da lavinas. En il decurs da la dumengia crescha il cunfin da naiv lura.

La bell'aura vegn l'autra emna

Vers mez da l'autra emna vegnia dentant ina zona da pressiun auta. Cun quella vegnia er la bell'aura, uschia Christoph Siegrist. Nà dal vest vegnia dentant gia il proxim disturbi cun aura pli variabla. En il Grischun saja dentant bain pussaivel, che la bell'aura tegnia pli ditg ch'en il rest da la Svizra, uschia il meteorolog da SRF Meteo.

RR actualitad 12:00