«I va be plaun vinavant» - Impediments e politica: Dus pertutgads raquintan

Quels dus umens han bler cuminaivel, ma a la fin èn els sco mintgin e mintgina tuttina fitg differents. Omadus lavuran, Marcus Caduff tar l'ARGO a Glion, Joel Thurneysen trais dis ad emna tar la chur@work a Cuira. Omadus umens èn persunas da cumpagnia – averts e cordials – ins ha il sentiment dad esser bainvis tar els.

Co resentan els il mund politic – han els insumma interess e chapeschan els, per tge ch'i va? Gea, di Joel Thurneysen, che fa sez part da gruppas da discussiun, scriva sez brevs a cussegliers federals e va savens a l'urna. Per el saja quai in dretg ch'el schazegia fitg, senza quel mancass simplamain insatge.

Pers in zic il contact entras la midada

In zic auter è la situaziun per Marcus Caduff. El na s'interessescha betg las grondas per politica u meglier ditg, betg pli. Pli baud, cura ch'el steva anc a Sedrun era quai in zic auter.

Da lez temp saja el anc mintgatant stà a l'urna per vuschar per ina nova suprastanza u per il nov president da vischnanca. Dapi ch'el haja fatg il pass tar l'ARGO a Glion, manchian dentant las discussiuns davos la maisa radunda ed uschia er l'interess da sa participar a votaziuns.

Legenda: Marcus Caduff durant sia lavur tar l'ARGO a Glion. RTR

«La politica è savens in zic plauna»

Joel Thurneysen è gia adina stà fitg interessà vi dal mund politic. Tenor el dovria er dapli inclusiun da persunas cun impediments. Quellas persunas portian dapli diversitad, dapli creativitad en il mund politic ed a la societad. In zic grittentà è l'um da 39 onns, sch'i vegn excludì persunas, mo perquai ch'ellas èn forsa autras che la maioritad, saja uss dal mund politic u en general da la societad e l'economia.

Bain sentia el, ch'ins haja fatg progress ils ultims onns cun l'integraziun da persunas cun impediment – tant la societad, sco er la politica. La politica saja dentant la politica, vul dir; i cuzza tenor el savens bler memia ditg, fin ch'i vegn realisà insatge.