Siglir tar il cuntegn

Chantun I va era senza Turitg

En il concept da la candidatura grischuna per ils gieus olimpics 2026 gioga era la citad da Turitg ina rolla impurtanta. Tenor il cusseglier guvernativ dal Grischun, Jon Domenic Parolini, na dovri dentant betg exnum la chapitala turitgaisa per realisar la candidatura grischuna.

Cusseglier guvernativ, Jon Domenic Parolini.
Legenda: Cusseglier guvernativ, Jon Domenic Parolini. Keystone

La maioritad dal parlament da la citad da Turitg na veglia betg exnum gieus olimpics d’enviern, e vegnia perquai era a refusar ina participaziun da la citad a la candidatura grischuna. Ils gieus custian be bler e portian pauc, uschia ha ditg il parlamentari e co-president da la PS da la citad da Turitg, Marco Denoth a RTR.

Guardar cun vischnancas sper Turitg

Per il cusseglier guvernativ dal Grischun, Jon Domenic Parolini è quai dentant nagin problem. Malgrà che la citad da Turitg figurescha en il concept tranter auter sco lieu d’occurrenzas, in dals quatter plaz per la surdada da medaglias, sco center da medias ed ensemen cun San Murezzan era sco lieu per las festas d’avertura e finiziun. «Nus discurrin en sasez dal spazi in zic pli vast da Turitg sco partenari», di Parolini. «Sch’i n’avess la fin finala betg da funcziunar cun la citad, sche lura fissi da guardar cun vischnancas enturn la citad.»

Discussiun na fa ussa betg anc senn

Il Grischun saja en mintga cas en tractativas cun la regenza dal chantun Turitg. E quella haja era confermà da discutar pli concret davart ina collavuraziun cun il Grischun e sia candidatura. Quai dentant pir suenter la votaziun mez favrer - pia per sch'il suveran grischun ha concedì il credit da 25 milliuns francs per la candidatura. Lura veglian ins era seser ensemen cun il cussegl da la citad da Turitg e discutar cun els intensiv- e seriusamain davart sia participaziun a la candidatura grischuna. E perquai na fetschia quai era betg senn da discutar avant la votaziun dals 12 da favrer davart la participaziun da la citad da Turitg.

Quai è simplamain ina pretensiun per far propaganda cunter la votaziun en il Grischun.
Autur: Jon Domenic Parolinicusseglier guvernativ

Il concept actual ina giada cun Turitg

Uschia che la citad da Turitg stettia ussa ina giada en il concept da la candidatura grischuna sco lieu d'occurrenzas, surdadas da medaglias e festas d'avertura e finiziun. Sch'i dovria dentant adattaziuns vi da quest concept, pia sche la citad da Turitg p. ex. na veglia propi betg sa participar vi da la candidatura grischuna, lura vegnan quellas midadas en mintga cas fatgas cura ch'i vegn elavurà ils detagls da la candidatura - e gliez è per previs suenter la votaziun il favrer, cura ch'ins ha il temps ed ils meds finanzials per far quai.

Pretaisa per far propaganda cunter candidatura

Che la citad da Turitg na vegn betg a far part a la candidatura grischuna, n’è tenor Jon Domenic Parolini dentant anc betg uschè cler sco quai ch'il co-president dals socialdemocrats Marco Denoth craja da savair. Il criteri principal da lez per in na dal parlament, vul dir «che las mesiras da segirtad vegnan a custar memia bler a la citad», na lascha el betg valair e manegia: «Quai n’è insumma betg anc ditg che la citad da Turitg avess da surpigliar sai jau tge custs per la segirtad. Quai è simplamain ina pretensiun per far propaganda cunter la votaziun en il Grischun.»

Pertge il mument sajan Swissolimpic, la Confederaziun e la Conferenza dals directurs chantunals da giustia e polizia anc vi da evaluar con auts ch'ils custs da segirtad èn insumma per las differentas candidaturas en Svizra. E qua stoppian ins l’emprim spetgar ils resultads, per pudair giuditgar tgi ch’ha da surpigliar tge custs e con auts che quels en la fin finala.