Identifitgà gruppa da laders

Tranter il 2012 e 2016 èsi vegnì rut en en divers edifizis d'industria en il Mesauc ed en la Val dal Rain grischuna. La Polizia chantunala ha uss identifitgà ina gruppa da Moldavs, ch'è responsabla per ils delicts.

In dals edifizis industrials pertutgads. Bild in Lightbox öffnen.

Legenda da maletgs: In dals edifizis industrials pertutgads. MAD

Tar pli che 150 delicts en la Val dal Rain grischuna en ils onns 2012 fin 2016 èn radund 30 vehichels, rauba da valur e daners contants vegnids engulads. La summa d'enguladitsch munta a passa in mez milliun francs, la summa da donns a plirs 100'000 francs, scriva la polizia chantunala. Intgins dals vehichels èn vegnids chattads pli tard en l'Italia.

En tut sajan 17 persunas vegnidas identifitgadas da la Polizia chantunala. I sa tractia d'ina gruppa da la Moldavs en la vegliadetgna da 20 enfin 35 onns. In um da 35 onns vegn fatg responsabel per la gronda part dals delicts. El era vegnì arrestà il favrer da quest onn en l’Italia e pli tard vegnì surdà a la Polizia chantunala dal Grischun. L'um è accusà per dapli che 80 da quels delicts. El ha confessà in grond dumber da delicts fatgs ils onns 2012 e 2013.

RR novitads 09:00