«Igl è uras da sortir da l'energia atomara»

L'iniziativa per l’abandun da l’energia nucleara survegn era sustegn or dal Grischun. In comité burgais enturn l'anteriur cusseglier naziunal Josias Gasser ha preschentà las raschuns daco ch'il suveran duai dir gea a l'iniziativa ils 27 da november.

Josias Gasser preschentà en la garascha da sia firma ils arguments per l’abandun da l’energia nucleara. Bild in Lightbox öffnen.

Legenda da maletgs: Josias Gasser (dretg) en la garascha da sia firma davart ils arguments per l’abandun da l’energia nucleara. RTR, Gion Caviezel

Ella saja impurtanta per noss’economia e saja in stausch d’innovaziun, manegia l'interprendider ed anteriur cusseglier naziunal dils verd-liberals, Josias Gasser. El cusseglia perquai da dir gea a l'iniziativa per l’abandun da l’energia nucleara ed uschia dar in ferm signal a l'economia ch'ins veglia ton pli spert extender las energias regenerablas – quai che fiss era bun per il Grischun. Vitiers vegnia ch’ins possia cun in gea a l’iniziativa era minimar ils ristgs d’in accident nuclear, che creschi cun la vegliadetgna da las ovras. «Avant onns tschantschavan ins anc che las ovras atomaras sajan 40 onns en funcziun. Suenter hai lura gì num 50 onns ed ussa discurr’ins schizunt gia da 60 onns», uschia Gasser. «I sto bain esser che la segirtad vegn sco emprim.»

«Caos regia be tar in na»

Caos en il sectur d'electricitad svizzer na dettia quai insumma betg cun dir gie a l'iniziativa dals verds, sco quai ch'ils adversaris pretendian, manegia Josias Gasser. Era betg cun prender davent da la rait trais da las tschintg ovras atomars en Svizra schon l'auter onn sco quai che l'iniziativa pretenda. «Il mument vegn producì pli pauca energia nucleara che quai ch'i fiss il cas l’auter onn tar in gea a l’iniziativa per l’abandun da l’energia nucleara», uschia Gasser. «Pertge tant Leibstad sco era Beznau I n'èn betg vi da la rait il mument ed i funcziunescha tuttina.» Quellas duas ovras atomaras furneschian numnadamain bun la mesadad da l'electricitad atomara producida en Svizra. «In chaos regia be, sche mintga gestiunari po laschar en funcziun sia ovra atomara uschè ditg ch’el less, sco quai ch’igl è il mument il cas», manegia Gasser.

Dar in cler segn per energias regenerablas

Natiralmain stoppian ins fin in tschert punct era importar dapli electricitad. Quai saja dentant per gronda part electricitad d'agens concerns ch'han investì en energias regenerablas en l’exteriur. Energia atomara ni da cotgla vegnia mo ad esser ina fitg pitschna part da l’electricitad che vegnia importada.

Arguments grischuns cunter l'iniziativa

Il comité grischun cunter l'iniziativa per l’abandun da l’energia nucleara preschenta, gievgia ils 10 da november, ses arguments daco ch'il suveran duess dir na a l'iniziativa.

RR novitads 12:00