Dapi paucas emnas è il film en producziun. Filmà vegn el en els renumads studios Twickenham a Londra, ed el conturn da Londra.
Cuntegn
Sco basa dal film vala il cudesch «A Giacometti Portrait» dal criticher d'art american James Lord. Quel era in bun ami da Giacometti. Il film vegn buc a mussar l'entira vita da Giacometti, mabain mo ina pitschna part, in pèr paucs onns avant ch'el mora.
Film cun acturs prominents
L’actur Geoffrey Rush gioga Alberto Giacometti. El è enconuschent ord films sco «The Kings Speech», nua ch’el gioga in terapeut da lingua, u ord «Pirates Of The Caribbean».
Ma er auters acturs da num e pum giogan en il film «Final Portrait». Per exempel Tony Shalhoub, che blers enconuschan ord la seria Monk, nua ch’el gioga il detectiv dubius. Er acturs sco Armie Hammer, Clémence Poesy u Sylvie Testud èn acturs che han laschà enavos lur fastizs en films da Hollywood.