Siglir tar il cuntegn
Inhalt

Chantun Il bel atun dat da ponderar a la hotellaria

Tant las pendicularas sco er ils hotels èn cuntents cun l'atun dad aur. Tuttina pretenda Ernst Wyrsch, il president da Hotelleriesuiss GR, ch'ils hoteliers repondereschian lur strategia. El pledescha per laschar avert er suenter las vacanzas d'atun atras fin la stagiun d'enviern.

viandanta en las muntognas sur Lucerna
Legenda: L'atun dad aur ha attratg inqual turist er en ils auts. Per Ernst Wyrsch han tals atuns anc bler potenzial. Keystone

Actualmain serran ils blers hotels vers mez u fin october fin mez u fin november e sa preparan per la stagiun d'enviern. Quest onn sajan quels che hajan decis da laschar avert in zic pli ditg, vegnids remunerads grazia a l'atun dad aur, uschia Ernst Wyrsch.

Il bel atun da quest onn saja però be il punct sin l'i. Sch'el guardia co ch'ils mais october e november sajan sa sviluppads ils ultims tschintg onns, saja quai in cler trend. Il president da Hotelleriesuisse Grischun pretenda perquai ch'ils hoteliers reageschan. Sia proposta: Laschar avert da la stad sur l'atun ed enviern fin la primavaira e lura persuenter far ina pausa extendida da l'avrigl fin il zercladur. En sia regiun turistica, Lai, han enfin uss 6 da 29 hotels decidì da laschar avert l'entir atun.

Sco arguments per sia proposta numna Ernst Wyrsch tranter auter che l'atun saja stà ils ultims 10 onns la pli stabila da tut las quatter stagiuns. Plinavant numna el la midada dal clima che procuria er u anc pli savens en l'avegnir per atuns bels e miaivels. E la dumonda saja qua uschè spert ch'i fetschia bel'aura, quai saja sa cumprovà ils ultims onns.

RR actualitad 12:00