Siglir tar il cuntegn

Header

video
En il rom dal preventiv 2017 decida il Cussegl grond era damain taglia per persunas giuridicas
Or da Telesguard dals 07.12.2016.
laschar ir. Durada: 48 Secundas.
cuntegn

Chantun Il budget 2017 è sut tetg, l'economia grischuna po esser cuntenta

Persunas giuridicas pajan en l’avegnir pli pauca taglia en il Grischun. Quai ha il Cussegl grond decidì cun 73 cunter 42 vuschs, ed ha uschia acceptà la proposta da la regenza. Era l'entir budget 2017 han deputadas e deputads acceptà.

Il budget chantunal prevesa per l'onn 2017 in deficit da 20.1 milliuns francs. Quai sajan finanzas solidas, ha la regenza grischuna accentuà.

Il Grischun po sa lubir reducziuns da taglia.
Autur: Barbara Janom Steiner Ministra da finanzas dal Grischun
audio
Saira: Intervista cun Gian Michael e Marcus Caduff
ord Actualitad dals 07.12.2016.
laschar ir. Durada: 3 minutas 17 Secundas.

La maioritad dal cussegl grond (PLD, PPS e PBD) è stà dal medem avis ed ha sustegnì l'idea da dar impuls a l'economia grischuna. La cumissiun da gestiun, la PCD e la PS avevan proponì da refusar la proposta, cunquai che be paucs profitassan e perquai ch'i saja il fauss mument.

Tgi profitescha?

Persunas giuridicas datti passa 11'000 en il Grischun, quai ha l'administraziun da taglia dal Grischun confermà ad RTR. Sco persunas giuridicas valan:

  • societad anonima (SA)
  • GmbH
  • cooperativa
  • fundaziun

audio
Medzi: Tgi profitass da reducziuns da taglia?
ord Actualitad dals 06.12.2016.
laschar ir. Durada: 3 minutas 16 Secundas.

Dentant betg tut las 11'000 pudessan spargnar taglia: Passa la mesadad da las persunas giuridicas na scriva ora nagin gudogn en la contabilitad e na pajan perquai era betg taglia sin gudogn (sin chapital dentant schon).

Pli paucas entradas da taglia

Chantun, vischnancas e las baselgias chantunalas han cun la reducziun dal pe da taglia pli paucas entradas - probabel pir a partir da l'onn 2018. Lura mancan al chantun circa 12 milliuns francs taglia ad onn, a las vischnancas 3 milliuns francs ed a las baselgias chantunalas circa 400'000 francs ad onn.

1'000'000 francs pli pauca taglia

audio
Mezdi: La Ems Chemie profitass
ord Actualitad dals 06.12.2016.
laschar ir. Durada: 1 minuta 43 Secundas.

Per la scheffa da la Ems Chemie Magdalena Martullo Blocher n'èsi be «ina pitschna reducziun dal pe da taglia». Tuttina beneventia ella tut ils sforz en questa direcziun, ha ella accentuà sin dumonda dad RTR.

Magdalena Martullo Blocher ha era gia fatg il quint quant che ses concern pudess spargnar: Var in milliun francs. Quai saja dentant plitost pauc per la Ems Chemie che fa ina svieuta annuala da duas milliardas francs.

RR actualitad 11:00

Artitgels legids il pli savens