In Care Team per il Care Team – quai datti tenor Susanna Meyer Kunz, che fa part da la direcziun spezialisada dal «Care Team Grischun». Quai damai ch'el è certifitgà da la rait naziunala per agid psicologic en cas d'urgenza. Quai muntia che mintga «care-giver» ch'è stà en in servetsch, haja in discurs cun la direcziun spezialisada.
Tut ils commembers da la direcziun spezialisada sajan scolads sco psicologs d'urgenza. Betg mo entras in discurs – sch'i stoppia esser er entras plirs discurs – vegnan ils «care-givers» sustegnids suenter lur servetsch. Els èn d'enconuscher vid lur vestas blauas. I sa tracta oravant tut da glieud che lavura en la tgira, psicologs e psicologas dals Servetsch psichiatrics dal Grischun u er da teologs. Tut ils 60 commembers hajan experientscha cun la tematica dal murir e la mort.
Er en la lavur dal mintgadi confruntads cun situaziuns da crisa
Per ir enturn cun las experientschas ed impressiuns na sajan betg mo ils discurs impurtants, mabain era ch'ins prenda temp per sasez, uschia la teologa. «Sch'ins po sur pli lung temp betg pli durmir endretg u sch'ins sa senta uschiglio engrevgià u grit, èsi impurtant dad ir per agid tar il care team u tar la direcziun spezialisada.» Quant ditg ch'ins haja per serrar giu cun quai na possian ins betg dir pauschal.
«Blers da noss «care-givers» han gronda experientscha e vegnan er en lur mintgadi da lavur confruntads cun la mort u situaziuns da crisa.» Dentant sappian ins era, che gist quels che sajan lung temp en servetsch sajan anc pli periclitads. «La fin finala essan era nus be umans», di Susanna Meyer Kunz. Gist perquai dovrian els era pussaivladads per reflectar lur lavur.
RR actualitad 17:00
