En vista al di da la festa naziunala appellescha l’Uffizi da sanadad a l’atgna responsabladad e recumonda urgentamain da resguardas las reglas da distanza e d’igiena. Quai scriva l’Uffizi da sanadad.
Las emnas passadas hai dà in augment dals cas en il Grischun. Actualmain sa chattian 61 persunas en isolaziun, 350 en quarantina ed ina persuna vegnia tgirada en l’ospital.
Cun sintoms restar a chasa
Ils cas da las emnas passadas han mussà, quant malign ch'il nov coronavirus è; persunas senza sintoms han derasà il virus entaifer curt temp e senza badar quai. Pervia da quai recumonda l'Uffizi da sanadad urgentamain da tegnair a chasa uffants cun sintoms sco dafraid, fevra, tuss, mal la gula e da consultar in medi. En nagin cas na dastgan uffants e giuvenils sa participar a purschidas da vacanzas e da gruppa – sco per exempel champs da vacanzas, pass da vacanzas u occurrenzas sumegliantas, sch'els han sintoms d'ina malsogna. Uschia vegnia impedì che ulteriuras persunas vegnian infectadas.
