Siglir tar il cuntegn

Chantun Il chantun Grischun tracta correct ses requirents d’asil minorens

Il chantun Grischun tracta ils requirents d'asil minorens betg accumpagnads sco quai che la lescha e la constituziun prescrivan. Quai concluda Peter Arbenz, l’anteriur directur da l'Uffizi federal per fugitivs, en ses rapport per mauns dal departament da giustia.

Legende: Video «sil punct» dals 06.07.2017 requirents d'asil minorens abspielen. Laufzeit 1:49 Minuten.
Dals 06.07.2017.

Il rapport è stà necessari, damai ch’il Cussegl grond e la vischnanca da Tavau avevan crititgà ch'ils requirents minorens en il center da transit a Tavau na vegnian betg tractads a moda correcta. Per controllar la situaziun ha Arbenz fatg ina visita en ils centers da transit a Tavau e Trimmis, nua ch’el ha interrogà la gestiun dal center sco era singuls fugitivs minorens.

Bunas notas per il chantun

En ses rapport dat Arbenz da principi bunas notas al chantun Grischun, uschia saja il chantun en puncto standards da qualitad en ina buna media. Uschia ha Arbenz era betg constatà surpassaments da la lescha chantunala, scriva il Departament da giustia, segirtad e sanadad. Sch’il dumber da requirents d’asil minorens creschia, alura dovria dapli resursas, scriva Arbenz en ses rapport.

Megliuraziuns dovri tuttina

Arbenz vesa dentant er potenzial d'optimaziun; per exempel da scolar meglier il persunal e da simplifitgar als fugitivs minorens da far praticums ed ulteriuras activitads.

Examinà sulettamain ils centers a Tavau e Trimmis

En il rapport da Peter Arbenz èn sulettamain vegni examinà ils centers da requirents d’asil minorens betg accumpagnads. Pia ils centers da transit a Tavau e Trimmis. Ils dus dus centers da fugitivs minorens betg accumpagnads a Glion e Favugn però betg.

Requirents d’asil en centers da transit n'han anc betg ina lubientscha da restar en Svizra.

RR actualitad 12:00