En preschientscha da radund 70 persunas, tranter quellas blers pertutgads, ha Jon Domenic Parolini dumandà las unfrendas per perdun. A chaschun da l'occurrenza commemorativa ha il cusseglier guvernativ emplantà in bostg. Quest bostg duai far endament simbolicamain l'ingiustia commessa. Tranter la via dal Fürstenwald ed il Prasserieweg duai vegnir realisà l'onn proxim in lieu da commemoraziun cun bancs e cun in bigl.
Exposiziun duai sensibilisar la publicitad
Plinavant ha la regenza concludì – per sensibilisar la publicitad – d'elavurar en il museum retic in'exposiziun temporara davart la povradad e davart las mesiras repressivas per motivs da provediment. Per ch'il tema possia vegnir accumpagnà da studentas e students sco er da persunas spezialisadas, vegn preparà material d'instrucziun e da scolaziun en il rom da l'exposiziun.
Fin l'onn 1981 èn daventads en Svizra ed en il Grischun uffants, giuvenils e persunas creschidas victimas da las mesiras repressivas. Bleras persunas pertutgadas han subì in grond donn. Quai ha marcà e marca anc adina decisivamain lur vita.
Segn da regurdientscha
Questas unfrendas han stuì far tras bler, perquai èsi in giavisch che quai ch'è capità na vegnia betg emblidà. In segn da regurdientscha duai commemorar las victimas e duai gidar a render conscient en la publicitad las painas supportadas e l'ingiustia commessa. Plinavant duai la publicitad vegnir sensibilisada per ch'ina tala ingiustia na capitia mai pli.
L'archiv chantunal duai permetter invista en las actas
En quest connex ha la regenza nominà il post da cussegliaziun da l'agid a victimas dal Grischun sco post da consultaziun per persunas pertutgadas. Plinavant ha ella incumbensà l'Archiv dal stadi dal Grischun da tschertgar las actas e da permetter l'invista da las actas a las persunas pertutgadas. La regenza ha er approvà il fond d'agid immediat e garantì meds finanzials per persunas pertutgadas.
RR actualitad 11:00
