Sin invit da primminister da la Bavaria Markus Söder èn la davos'emna represchentants da quatter pajais s'inscuntrads sin la «Herreninsel» sin il lai «Herrenchiemsee» en Bavaria. Era cusseglier guvernativ Christian Rathgeb (PLD) è stà da la partida ed ha pudì discutar.
Dapli collavuraziun tranter territoris alpins
Tut ils pajais han gì sumegliantas finamiras: Preservar ils territoris alpins. Uschia èn ils represchentants vegnids a la conclusiun da lavurar pli stretg. Christian Rathgeb di ch'ils discurs han purtà bler al Grischun. Vinavant hajan ins pudì emprender bler in da l'auter.
Elavurar concepts per il futur
Ins veglia perscrutar pli fitg en il sectur dal clima, tranter auter era cun duvrar effizientamain energias regenerablas. Sco Christian Rathgeb di saja la forza idraulica per il Grischun da spezialmain gronda impurtanza. Vinavant hajan ins decis d'iniziar ina gruppa da persunas dal fatg che duess mirar tge projects e tge mesiras che fissan adequatas. Il fanadur veglian ils pajais puspè s'entupar per discutar vinavant.
RR actualitad 17:00