Per la segunda giada han examinà il chantun ed intginas vischnancas, co ch’ils mustgins asiatics sa derasan en Grischun. Ils pizs dals mustgins fan bain mal – pli mal è però, ch'il mustgin-tigher po er infectar umans cun virus.
Differents territoris sut la marella dals scienziads
Cun traplas d’ovs vegnian registrads per exempel mustgins-tigher u mustgins da chaglias. Las examinaziuns il 2017 sajan vegnidas fatgas en differents lieus en il Grischun, scriva l’uffizi. Per la segunda giada en la part sut dal Mesauc, tar pausadis lung l’A13 e tar singulas emprovas da controlla en il territori da Cuira e da Landquart.
Per l'emprima giada èn vegnidas examinadas las vischnancas da Bregaglia e da Brusio.
Mustgin-tigher sa chasà en la part sut dal Mesauc
Las examinaziuns mussian, ch'il mustgin-tigher asiatic saja sa chasà definitivamain en il vitg da Monticello (vischnanca da San Vittore). En pli haja el «s'etablì potenzialmain» a Roveredo e Grono. En traplas situadas en il nord dal San Bernardin n'è el betg vegnì chattà – e n'er en las vischnancas da Cama, Bregalia e Brusio.
Mustgin da chaglia er al nord da las Alps
Il maletg tar il mustgin da chaglia asiatic è anc pli cler: Quel saja vegnì chattà en tut las traplas d'ovs da l'examinaziun 2017 – dimena tant en il sid sco er al nord da las Alps. Quest mustgin na vegnia dentant betg considerà uschia donnegius sco il mustgin-tigher. U cun ils pleds da l'uffizi tenor la classificaziun federala «sco vectur plitgunsch irrelevant per transmetter malsognas».
Populaziun duai prevegnir a la derasaziun dals mustgins
Cunter ils mustgins gida dad als prender la pussaivladad da metter ovs: uschia per exempel sientar regularmain pitschnas accumulaziuns d'aua stagnanta sco tar vasas da flurs, sutvaschs, recipients da ruments, ma er tar sabluneras e recipients per aua da plievgia ed auters lieus che pon servir sco gnieus per ils mustgins.
Er il chantun vegn a cumbatter activamain cunter ils gnieus da mustgins. Il monitoring dals mustgins vegn fatg er quest onn.
Dapli infurmaziuns dals mustgins
RR novitads 14:00
