Siglir tar il cuntegn
cuntegn

Chantun «Il NA è in mussament per la trilinguitad»

Grischunas e Grischuns vulan mantegnair il sistem da linguas estras en scola. Uschia han scolars e scolaras vinavant duas linguas estras en scola primara. 65,19% dals votants han ditg NA a l'iniziativa che vuleva mo ina lingua estra.

Legenda: Guardar il video Cler NA – las reacziuns . Durada 04:15 minutas.
Or da Telesguard dals 23.09.2018.

Il pli cler NA hai dà a Buseno, là han 100% refusà l'iniziativa (0 a 36 vuschs). Er l'entira Surselva e l'entira Engiadina han cleramain ditg NA a l'iniziativa che pretenda mo ina lingua estra en scola primara.

Satisfacziun per Lia Rumantscha e la Pro Grigioni Italiano

Il resultat saja in mussament da «solidaritad tranter las cuminanzas linguisticas en il Grischun», hai num en la communicaziun communabla. Quai vegnia da bun al spiert da cuminanza chantunal. La Lia Rumantscha sco er la Pro Grigioni Italiano speran che las discussiuns davart il dumber da linguas en scola primara sajan cunquai terminadas.

Sulet sustegn en la regiun Partenz / Tavau e Landquart

Mo en duas da las 11 regiuns Grischunas ha l'iniziativa chattà ina maioritad – quai en la regiun da Partenz / Tavau cun 60,68% GEA, sco er en la regiun da Landquart cun ina pitschna maioritad da 50,50%. A Claustra han per exempel 69% dals votants e las votantas ditg GEA a l'iniziativa.

Nus n'avain betg dumagnà da persvader las autras regiuns linguisticas da noss model.
Autur: Jöri LuziIniziant

Jöri Luzi, l'iniziant da l'iniziativa è persvas ch'els avessan gì success en in chantun da lingua tudestga. La trilinguitad dal Grischun haja però gì ina grond'influenza, quai vesian ins er sin la charta cun ils resultats. Sco Luzi ha ditg envers RTR, chapeschia el er las raschuns dals Rumantschs e dals Talians. El avess però giavischà da pudair midar il model en il territori da lingua tudestga.

RR votaziuns 23-09-2018