Il nov - Daniel Spadin vegn chancelier grischun

La regenza grischuna ha elegì l'advocat Daniel Spadin da Razén sco nov manader da la chanzlia chantunala. El succeda a Claudio Riesen che va en pensiun la fin da zercladur da l'auter onn.

In portrait da Spadin. Bild in Lightbox öffnen.

Legenda da maletgs: Il secretari dal departament da giustia, segirezza e sanadad, Daniel Spadin. Keystone

Davart strategias, finamiras e co manar la chanzlia chantunala en il futur, na vul il nov-elegì timun, Daniel Spadin anc dir nagut. El cumenzia pir en 8 mais ses nov post e fin lura saja anc Claudio Riesen en uffizi. Perquai ditgia el per il mument be tant: «Jau m’allegrel natiralmain extraordinariamain che la regenza ha elegì mai e ch’jau poss cumenzar l’uffizi l’emprim da fanadur.»

Fitg integher cun auta cumpetenza social

Che la regenza è la fin finala sa decidida per il giurist da 45 onns da Razén, ch'è dapi il 2013 secretari dal departament da giustia e segirtad, fa era plaschair a ses schef actual, cusseglier guvernativ e president da regenza Christian Rathgeb.

«Daniel Spadin accumplescha blers criteris per quest post da chancelier chantunal grazia a sia experientscha sco secretari da departament, giurist, advocat e procuratur public.» Vitiers vegnia ch’el saja enconuschent, haja ina buna rait ed experientscha da manar en differents secturs. «Ed era sco persuna, è el ina persuna fitg integra cun auta cumpetenza sociala.» Qualitads ch'i dovria sco chancelier chantunal e che hajan la fin finala era persvas la regenza d'eleger Daniel Spadin (senza partida) or dals numerus candidats, concluda Christian Rathgeb. Tut en tut sajan numnadamain 18 persunas s’annunziadas per la plazza.

Cusseglia er la regenza

Daniel Spadin daventa successur da Claudio Riesen che va en pensiun per la fin da zercladur 2017. Il chancelier maina la chanzlia chantunala sco post da stab, da coordinaziun e da colliaziun dal cussegl grond, da la regenza e da l'administraziun. Plinavant è il chancelier responsabel per l'organisaziun e per la preparaziun da las sesidas da la regenza, a las qualas el prenda part cun vusch consultativa.

RR novitads 09:00