Siglir tar il cuntegn

Header

Video
Invista sin il pli grond plazzal en il Grischun
Or da Actualitad video dals 11.09.2016.
laschar ir
cuntegn

Chantun Il pli grond plazzal en il Grischun

Per in di èn vegnidas interruttas tut las lavurs sin ils dus plazzals da fabrica a Preda e Spinas. La Viafier retica ha numnadamain envidà tut ils interessads a lur di dal plazzal avert dal nov tunnel da l’Alvra. Da quai da 2'000 visitadras e visitaders èn vegnids.

Renato Fasciati, directur da la Viafier retica avant in pult da pledar. En ses maun dretg tegna el in microfon.
Legenda: Renato Fasciati, directur da la Viafier retica swiss-image.ch

Durant bunamain in mez di han persunas interessadas gì la pussaivladad da dar in sguard en las lavurs actualas da la construcziun dal nov tunnel da l’Alvra. Ils organisaturs da la Viafier retica avevan spetgà da quai da 1'000 visitaders. A la fin dal di dal plazzal avert vegnan quai ad esser stà var 2'000 interessads ch'èn vegnì a guardar, sco ils organisaturs han ditg. Per la Viafier retica è quest arranschament stà ina chaschun per mussar ad in public vast quai ch’ins na vesa uschiglio betg.

Sper la guida tras il plazzal ed ina exposiziun da novs vehichels sin binaris è era la visita en l'intern, pia en il tunnel, stada da grond interess.

Per l’emprima giada insumma han ins pudì visitar il lieu da las lavurs da perfuraziun sco era la caverna cun la zona da disturbi «Raibler Rauwacke», il mument in dals lieus da lavur ils pli principals da la construcziun dal nov tunnel. En questa caverna vegn numnadamain schelà il grip da la zona da disturbi enfin che tut il massiv è stabil avunda per cuntinuar cun las lavurs d’avanzament.

Il directur da la viafier retica Renato Fasciati, il president Stefan Engler e dus represchentants da las viafiers Hakone Tozan stattan avant in car da la viafier retica cotschen. Sin quel è scrit si en letra giapunaisas hakone Tozan Railway. Plinavant entgins maletgs da flurs (sihlouettas alvas)
Legenda: Il directur da la Viafier retica Renato Fasciati, il president Stefan Engler e dus represchentants da las viafiers Hakone Tozan swiss-image.ch

Autas visitas ord il Giapun

Era ina delegaziun Giapunaisa cun represchentants da la «Hakone Tozan Railway», dapi il 1979 la viafier partenaria da la Viafier retica han fatg part a las festivitads. A chaschun dal di da las portas avertas è vegnì inaugurà in nov cumpartiment da tren en il stil Giapunais che fa a partir dad uss part ad in dals novs trens da cumposiziun bloccada da l’Alvra.

La «Hakone Tozan Railway» è la pli veglia viafier da muntogna dal Giapun e fabritgada tenor l’exempel da la lingia dal Bernina. Adina puspè han ins communablamain fatg pliras acziuns da reclama ensemen. «Tozan» (登山) munta dal reminent «ir en ils culms», «Hakone» è il num d'ina citad pitschna en il Giapun.

Video
L'avertura dal tunnel dal Alvra cun ina delegaziun ord il Giapun
Or da Telesguard dals 12.09.2016.
laschar ir

RTR/dm/md