Siglir tar il cuntegn

Header

cuntegn

Chantun Il profi, l'expert ed il laic

A Berna cumenza oz l’exposiziun da Swiss Press Photo cun las meglieras fotografias da pressa da l’onn passà. Tgi èn però ils fotografs da pressa dal Grischun? Quai èn ils fotografs da la Somedia, da Keystone, da Swissimage ubain journalists che prendan sez la camera enta maun.

video
Marco Hartmann, il chef-fotograf da la Somedia
Or da RTR dals 07.09.2016.
laschar ir. Durada: 1 minuta 21 Secundas.

L’emprim ch’ins contempla cura ch'ins avra ina gasetta è la fotografia. La fotografia da pressa sto pervia da quai esser autentica e mussar la vardad. Ella na dastga betg esser retuschada. Pia nagins nas che vegnan fatgs pli pitschens ubain faudas che vegnan gulivadas. Almain ils fotografs da la Somedia na dastgan betg far quai. Els fotografeschan per la Südostschweiz, per il Bündner Tagblatt ed er per part per la Quotidiana. Il program per far midadas Photoshop tutga bain tranter ils instruments dal mintgadi dal fotograf da pressa, dentant èsi d'esser fitg precaut, di il Chef-fotograf Marco Hartmann.

In ulteriur credo da l’expert: Il fotograf na dastga avair nagins pregiudizis envers la persuna che vegn fotografada. Era sch’ins sto magari fotografar insatgi che na plascha forsa betg ad ins persunalmain, ston ins per l’amur da la fotografia laschar davent las atgnas opiniuns. Cun auters pleds: L’opiniun persunala na dastga – tut auter che en la fotografia artistica – betg esser vesibla en la fotografia da pressa.

L'agentura che fa er magari fotos da pressa

Cun ils quater fotografs da la Somedia, è la scena da fotografs da pressa Grischuna lu er schon bunamain cumpletta. Almain quai che pertucca fotografar prinzipalmain per gasettas grischunas.

video
Andy Mettler, mainafatschenta da Swissimage
Or da RTR dals 07.09.2016.
laschar ir. Durada: 1 minuta 27 Secundas.

Dasperas dat quai anc l’agentura Swissimage a Tavau che fa mo magari fotografias per la pressa. L’agentura è prinzipalmain engaschada da destinaziuns turisticas, da firmas ubain per events da sport. La professiun da fotograf saja ils davos onns vegnida en la crisa, di il mainafatschenta Andy Mettler. Per l’ina perquai che fotografias professiunalas ord la Germania smatgian ils pretschs, per l’autra perquai che mintgin che ha ozendi ina camera ubain in telefonin sappia metter sias fotografias online. «Uschia che firmas laschan magari far il collavuratur cun l’atgna camera las fotografias enstagl d'engaschar il profi che custa.» Ed er tar las medias vegnia dà adina dapli al schurnalist la camera enta maun per spargnar custs, enstagl da trametter per exempel ad ina conferenza da pressa anc in fotograf vitiers.

Magari sto er il schurnalist prender la camera enta maun

Tar l'Agentura da Novitads Rumantscha (ANR) ubain la Pagina da Surmeir èn er ils schurnalists sez responsabels per lur fotografias. In dad els è Gion Nutegn Stgier che ha ses biro a Savognin.

video
Gion Nutegn Stgier, journalist e fotograf laic
Or da RTR dals 07.09.2016.
laschar ir. Durada: 1 minuta 48 Secundas.

El ha visità gia avant onns in curs da fotografar per gasettas – dal reminent tar Andy Mettler. Amez Cuira ha el stuvì fotografar differents motivs e suenter ha l’expert ditg tgeninas fotografias ch’èn adattadas per la gasetta e tgeninas betg. Ed el ha er in tric per evitar la sgarschur da mintga schurnalist che sto far sez la fotografia – numnadamain il podi en halla da gimnastica cun beamer e storas mez serradas. Lura tschenta el simplamain ils protagonists davant da la taila cun il beamer e metta els en posiziun.

Sper ils fotografs da la Somedia e quels da l‘agentura da Swissimage ni ils schurnalists che prendan sez l’apparat enta maun fotografescha en il Grischun professiunalmain er anc Gian Ehrenzeller. El è fotograf tar la gronda agentura Keystone, l'agentura che na fa e na rimna betg mo fotografias betg mo da e per la Svizra, mabain da l’entir mund. Per la Svizra orientala è Gian Ehrenzeller responsabel. In di ha el per exempel in termin en Turgovia, lura va quai l’auter di a Son Gagl ubain a Glaruna e magari lura er en il Grischun. Il fotograf da Keystone è uschè bler per las vias, ch'i n’ha betg tunschì spontanmain per in pitschen purtret.

Artitgels legids il pli savens