Siglir tar il cuntegn
Inhalt

Chantun Il WEF saja daventà memia grond e memia char

Ina gruppa d'interess ha distribuì il glindesdi in flyer als abitants e las abitantas da Tavau. En quel appellescha la gruppa da dir Na ils 23 da settember a l'augment dals custs da segirezza.

Autos da polizia durant il WEF.
Legenda: Il WEF na duai betg daventar pli grond. Perquai appellescha ina gruppa d'interess als votants da Tavau da dir Na a l'augment dals custs da segirezza. Keystone

Ils da Tavau han da votar ils 23 da settember davart in augment da custs per la segirezza al WEF. Il glindesdi han ils abitants e las abitantas da la vischnanca survegnì in flyer en la chascha da brevs. En quel propaghescha la gruppa d'interess «Tavau co vinavant?» da dir Na a l'augment da custs.

Per blers indigens saja il WEF gia uss memia grond. La speculaziun ch'il president american Donald Trump veglia inscuntrar il 2019 il dictatur da la Corea dal Nord Kim Jong-Un ed il pli grond budget per la segirtad, sajan mussaments ch'il WEF duai daventar anc pli grond. Ultra da quai n'èsi per la gruppa d'interess betg acceptabel, ch'i dettia adina dapli restricziuns a Tavau durant il temp dal WEF – cunzunt puncto mobilitad dals indigens.

Flyer.
Legenda: Cun quest flyer vul ina gruppa d'interess impedir in augment dals custs da segirezza al WEF. MAD

Arguments dals aderents

Per la suprastanza (Kleiner Landrat) ed il parlament da Tavau (Grosser Rat) predomineschan percunter ils effects positivs dal Forum mundial d'economia per l'economia locala. Tavau stoppia tgirar sias occurrenzas unicas sco per exempel l'inscunter annual dal WEF. Bleras plazzas da lavur dependian a moda directa u indirecta da congress ed events. Ultra da quai procuria il WEF a Tavau mintg'onn da nov per publicitad internaziunala.

Credit da passa 1,1 milliuns francs ad onn

Concretamain duai la vischnanca da Tavau surpigliar 1/8 dals custs durant ils onns 2019 enfin 2021, pia 1,125 milliuns francs per onn. Il rest dals custs vegn repartì sco enfin qua. 3/8 surpiglia il stadi. Il chantun ed il WEF surpiglian mintgamai 2/8.

RR novitads 17:00