Siglir tar il cuntegn

Header

Territori da skis a Tavau - ins vesa la sutgera e bleras persunas che van cun skis sutor
Legenda: La fin d'emna da Pasca èn pulit blers stads sin pista. Keystone
cuntegn

Chantun Ils firads da Pasca na pon betg salvar la stagiun da skis

L'emprima bilantscha da las pendicularas en il Grischun è pulit positiva. Surtut la sonda da Pasca saja stada frequentada bain.

Il president da las pendicularas grischunas, Silvio Schmid, discurra d'ina fin d'emna pulita. Ils territoris da skis hajan dentant sentì l'aura variabla da venderdi e dumengia da Pasca.

Schmid ha punctuà che la prognosa da l'aura saja decisiva per la frequentaziun. Questa giada haja la prognosa main buna fatg che blers hajan decidì dad ir cun skis mo la sonda.

Il territori da skis da l'Arena Alva da Flem-Laax-Falera ha dumbrà radund 14'000 persunas sin pista la sonda. Katja Kamps, la pledadra da l'Arena Alva ha ditg a l'agentura da novitads sda che quai saja stà in dals megliers dis da l'entira stagiun.

Ils dis da Pasca na pon dentant betg salvar la stagiun. L'Aren'Alva quinta cun in minus da 10% per questa stagiun. Las pendicularas da l'Engiadin'Ota spetgan schizun in minus da 12 fin 14%.

Cifras concretas publitgeschan las pendicularas grischunas lura l'entschatta avrigl.

RTR/ggf/sc