Siglir tar il cuntegn

Header

cuntegn

Chantun Ils tschains d'aua sut squitsch

Perquai ch'ils pretschs d'electricitad èn giun tschaler balluccan ils tschains d'aua. En bleras vischnancas da muntogna na vai betg senza. Ils tschains d'aua fan ora ina gronda part da lur entradas. Nus avain visità Avras, ina da quellas vischnancas che fa quitads.

audio
Mezdi: Avras – ina vischnanca dependenta dals tschains d'aua
ord Actualitad dals 20.03.2017.
laschar ir. Durada: 4 minutas 41 Secundas.

Prest 100 onns existan ils tschains d'aua. Cun la fin da l'onn 2019 scada la lescha federala che regla ils tschains d'aua. I dovra ina soluziun. Il mument è l'avegnir malguess. Co ils tschains vegnan a sa cumponer en l'avegnir sa nagin. Il matg trametta il departament federal per energia en consultaziun ina poposta. Probabel vegni a dar quella ch'ils tschains vegnan separads en ina part fixa ed ina variabla. Dentant dependi quant auta che la part fixa è. Kurt Patzen, il president communal d'Avras quinta cun la mesadad. Vul dir ch'i dat per sia vischnanca empè dals oz 600'000 francs be pli 300'000 francs. Quai munti ch'ins stoppia strenscher la tschinta in pau dapertut. Dentant, quai possian ins far in pèr onns, a lunga vista vegni grev per la vischnaunca cun sias 8 fracziuns.

Chantun e vischnancas teman per lur daners

550 milliuns francs sbuccan onn per onn en las cassas dals chantuns e da las vischnancas. 160 milliuns èn ids en il Vallais, 120 milliuns en il Grischun. Mintgamai 55 milliuns en il Tessin e l'Argovia, 50 milliuns ha Berna survegnì, 25 milliuns il chantun Uri. La fin dals tschains d'aua fiss fatal. Suener las consequenzas entras l'iniziativa che limita secundas abitaziuns ed il ferm franc fiss quai ulteriuras entradas impurtantas che mancassan. «Noss'entira infrastructura dependa dals tschains d'aua» gi il president communal Kurt Patzen. E sco i tuna ad Avras tuni era en tut tschellas 90 vischnancas grischunas ch'èn dependentas dal pretsch che vegn pajà per lur ressursa preciusa.

Tge valita ha l’aur blau en l’avegnir?

En il Grischun profitescha quasi mintga vischnanca dals tschains d’aua. La cuminanza d’interess da las vischnancas concessiunarias (IBK) guarda pensiv en l’avegnir. I dovria pir che mai la cuminanza d’interess ch’exista dapi 5 onns. Uschia Not Carl, il president da la IBK a chaschun da la radunanza generala. Tenor el mancan novas strategias e surtut las allianzas necessarias per avair success en l’entira debatta. I fa prescha. A partir da l’onn 2020 vegn l’autezza dals tschains d’aua reglada da nov. Not Carl appellescha era a la regenza grischuna da vegnir activa.

audio
Bunura: IBK: Ils chantuns muntagnards ed il tschains d'aua
ord Actualitad dals 21.03.2017.
laschar ir. Durada: 3 minutas 28 Secundas.

L’onn passà han las tractativas tranter ils chantuns da muntogna ed ils concerns d’energia fatg naufragi. Dentant ha la Confederaziun elavurà ina proposta che va il matg en consultaziun. A curta vista saja uss impurtant ch’i dettia in gea ils 21 da matg a la strategia d’energia 2050. Quella strategia porta a la forza idraulica plirs 100 milliuns francs.

Tenor ils dus parlamentaris a Berna, Silva Semadeni e Stefan Engler, ch’eran a la radunanza generala da la cuminanza d’interess da las vischnancas concessiunarias, stoppia la finamira esser da mantegnair il nivel actual dals tschains d’aua. Averta è dentant la dumonda co quels vegnan calculads en l’avegnir.

RR actualitad 12:00

Artitgels legids il pli savens