En general, uschia respunda la regenza grischuna vinavant, na sajan las consequenzas finanzialas da la «refurma da taglia sin interpresas III » per il Grischun anc betg cleras. Ellas dependian da las mesiras tar la taglia sin il gudogn, tar la taglia sin il chapital e tar ils differents instruments.
GR sco lieu d'economia duai restar abel da concurrenzar ad auters
La regenza è decisa da prender mesiras per ch'il chantun Grischun restia abel da concurrenzar ad auters chantuns sco lieu d’economia. I saja d'examinar quant fitg ch'ins veglia sbassar l’imposta sin gudogn per interpresas.
Cun preschentar il budget 2017 l’emna passada aveva cussegliera guvernativa Barbara Janom Steiner annunzià l’emna passada da pudair sbassar las impostas per interpresas en Grischun da 16,7% sin 16,1%. La buna situaziun finanziala pussibiliteschia da dar quest impuls a l’economia.
Tar las persunas privatas gia ozendi «ina chargia fitg moderada»
In relaziun cun auters chantuns hajan persunas privatas sin ils stgalims da progressiun bass e mesauns gia ozendi ina chargia dad impostas fitg moderada. Perquai na possian ellas betg spetgar ina reducziun dad impostas, scriva la regenza.
La votaziun è ils 12 da favrer 2017
La refurma vegn ad avair consequenzas finanzialas per la Confederaziun, ils chantuns e las vischnancas. La Confederaziun quinta mintg'onn cun 1,3 milliardas damain entradas.
Cunter la refurma è vegnì fatg il referendum. Davart quel decida il suveran ils 12 da favrer 2017.
RR novitads 11:00
