L'elecziun tenor proporz prevesa ch'in votant sa dar duas vuschs ad in candidat ni ina candidata, quai ch'ins numna cumular. Quand che vegn cumulà el Grischun n'è betg enconuschent el detagl.
Las retschertgas dal politolog Clau Dermont mussan uss, quand savens che in candidat è vegnì cumulà, pia quantas vuschs dublas che in candidat ha survegnì. Entras quai sa Clau Dermont eruir sin quants singuls cedels da votar che in candidat è effectiv stà. Quella cifra numna el «influenza» e di pia, sin quants cedels che ina persuna era effectiv si.
Heinz Brand è per exempel stà sin sur 26% da tut ils 60'190 cedels da votar inoltrai. Quai correspunda pia a rodund in quart da tut ils votants. Martin Candinas ha tenor quai quint in’influenza da rodund 25%, Magdalena Martullo-Blocher da circa 21%, Silva Semadeni da circa 19%, Jon Pult da circa 18% euv.
Elecziuns grischunas 2015 – Influenza e cumulaziun tenor candidatAs
| cedels | 1x | 2x | influenza en % | vuschs | |
|---|---|---|---|---|---|
| Brand | 15'906 | 8'787 | 7'119 | 26,43 | 23'025 |
| Candinas | 15'301 | 8'948 | 6'353 | 25,42 | 21'654 |
| Martullo-Blocher | 12'695 | 6'607 | 6'088 | 21,09 | 18'783 |
| Semadeni | 11'370 | 7'949 | 3'421 | 18,89 | 14'791 |
| Pult | 10'818 | 7'342 | 3'476 | 17,97 | 14'294 |
| Gasser | 9'983 | 7'018 | 2'965 | 16,59 | 12'948 |
| Campell | 9'751 | 7'099 | 2'652 | 16,2 | 12'403 |
| Felix | 7'212 | 5'856 | 1'356 | 11,98 | 8'568 |
| Favre | 7'090 | 6'075 | 1'015 | 11,78 | 8'105 |
| Michel | 5'257 | 3'747 | 1'510 | 8,73 | 6'767 |
| Casutt-Derungs | 5'409 | 4'694 | 715 | 8,99 | 6'124 |
| Pfäffli | 4'258 | 3'089 | 1'169 | 7,07 | 5'427 |
Maschadar u era «panaschar»
Entras l’analisa dils singuls cedels pon ins uss era dir, quant savens che glistas da partidas cuntegnan persunas dad autras partidas, pia quand savens ch’i è vegnì panaschà sin las singulas glistas. Il panaschar è medemamain ina caracteristica dil proporz. Uschia ves’ins per exempel cha las glistas da las partidas da la sanestra e da la dretga cuntegnan pli savens ils agens candidats che quellas dal center. Sin las glistas da las partidas PCD, PBD, PLD vegni panaschà dapli. Quai vul dir che sin lur glistas hai relativamain bler candidats dad autras partidas.
RR actualitad 08:00