Siglir tar il cuntegn

Header

video
Quint annual 2015 chantun Grischun
Or da Actualitad video dals 17.03.2016.
laschar ir
cuntegn

Chantun In plus enstagl d’in minus – il quint 2015 dal Grischun

Il chantun Grischun ha fatg l'onn passà in gudogn da 17 milliuns francs, il preventiv aveva quintà cun in deficit da 55 milliuns.

La raschun per quest resultat positiv sajan surtut entradas pli autas, communitgescha il Departament da finanzas. D'ina vart hajan las entradas da taglia surpassà il preventiv, da l'autra vart haja il pajament dubel da la Banca naziunala purtà ulteriurs milliuns en cassa.

Sbursà damain che planisà

Mabain èn era las expensas restadas en il rom planisà. Ed intgins posts sco ils custs da material, las contribuziuns chantunalas a terzas persunas sco era las investiziuns nettas èn perfin stads cleramain sut il preventiv, sco il chantun scriva.

Influenza da la bursa

Patì han las finanzas grischunas dal 2015 tar il resultat extraordinari cun in minus da 43 milliuns. Las rectificaziuns da la valur da martgà da las aczias da la Repower ch'il chantun posseda han chaschunà ina perdita da 91 milliuns francs. Persuenter ha il Grischun pudì profitar da las valurs da bursa pli autas dals certificats da participaziun da la Banca chantunala grischuna (+112 milliuns) e da las aczias da la Ems-Chemie Holding SA (+9 milliuns).

Il vent mida gia quest onn

Las perspectivas per ils proxims 3 onns restan dentant tendidas.Gia il resultat operativ da quest onn vegnia ad esser cleramain mender, hai num or dal Departament da finanzas. D'ina vart na saja betg da far quint cun entradas fiscalas pli autas. E da l'autra vart saja cler che pliras posiziuns influenzeschian il quint 2016 a moda negativa, uschia la reducziun da la part vi da la gulivaziun da las resursas da la Confederaziun, l'introducziun da la refurma da la gulivaziun da finanzas en il Grischun sco era l'augment tar las posiziuns da contribuziun las pli grondas.

RR Novitads 10:00

Artitgels legids il pli savens

Scrollar a sanestra Scrollar a dretga