Siglir tar il cuntegn
Inhalt

Chantun «In radi d’argient al firmament»

Chattar insatgi che n’è betg cuntent da la denunzia penala en chaussa da la vendita dal hotel Therme è grev. Tant il cumprader Remo Stoffel sco era Peter Schmid da la gruppa d’avdants che cumbattan la vendita, beneventan la decisiun da la regenza grischuna.

Peter Schmid, il pledader da la gruppa da "Burgais preoccupads".
Legenda: Peter Schmid, il pledader da la gruppa da «Burgais preoccupads». SRF

Peter Schmid è stà commuventà, cura ch’el ha udì che la regenza grischuna fetschia ina denunzia penala cunter nunenconuschent. «Dapi tschintg onns empruvain nus da purtar scleriment en l’entira chaussa, ed ussa datti propi ina strivla d’argient al firmament cun quella denunzia penala», concluda el. Uschia na vegnia a restar naginas accusaziuns pli.

E forsa, cura che tut saja sclerì, sappian ins lura era cumenzar da nov e puspè vegnir perina a Val S. Pieder. «Impurtant a me è cunzunt ch’il chantun ha fatg ina denunzia penala cunter nunenconuschent», manegia il pledader da la gruppa dals «Burgais preoccupads». Perquai ch'i giaja insumma betg per suspectar persunas.

Impurtant è ch’il vitg vegn sisur tge ch’è capità, uschiglio vegn l’istorgia adina puspè a tschiffar nus.
Autur: Peter Schmidpledader gruppa «Burgais preoccupads»

Levgià è er Stefan Schmid, il president communal actual da Val Son Pieder. Il rapport da l'autoritad da surveglianza dal chantun confermia numnadamain che la vischnanca haja lavurà correct ils ultims 4 fin 5 onns. Ch'il chantun haja fatg ina denunzia penala encunter nunenconuschent e uschia surdà tut las actas a la procura publica, chatta er el bun. Schmid na vul dentant betg dir dapli en chaussa, cunquai ch’el n’era betg en uffizi, cura che l'hotel Therme è vegnì vendì il 2012 a Remo Stoffel per 7,7 milliuns francs.

Stoffel n'ha nagut da zuppar

Lura era Margrit Walker anc presidenta. E lezza na vul betg prender posiziun en detagl. Ella di mo tant: «Jau chat bun, sche tut vegn sclerì». Sumegliant tuna quai tar Remo Stoffel. El na piglia bain betg sez posiziun, lascha dentant drizzar ora da ses pledader: ch'el beneventia la decisiun da far ina denunzia penala e che l’entir cas vegnia uschia anc ina giada sclerì giuridicamain. El n’haja numnadamain nagut da zuppar.

Sumegliant tuna quai tar Stephan Schmid, ch'era president dal cussegl d'administraziun dal Hotel Therme durant la vendita. El vegnia a guardar cun calma envers ina procedura penala pussibla.

RR actualitad 17:00