En il Grischun datti memia paucas purschidas per uffants e giuvenils. Da quest maini è l'organisaziun jugend.gr che s'engascha per la promoziun da giuventetgna en il chantun. Per midar quai è l'organisaziun sin viadi cun ina rulotta per giuvenils. Quella ha er fatg in stop a Cuira sin la plazza da teater. Là ha ella vulì pledentar ils deputads dal Cussegl grond.
Rulotta sco lieu da sentupada
La rulotta da la jugend.gr è in lieu d'inscunter sin rodas. Ella è dapi circa in onn da viadi en il Grischun e sa ferma en vischnancas che n'han naginas purschidas per uffants e giuvenils, vul dir, lieus e regiuns senza per exempel in'uniun, senza projects ubain stanzas per giuventetgna. La rulotta na duai betg mo porscher in lieu per discussiunar e s'entupar, mabain er mussar a las vischnancas ch'il basegn da purschidas è avant maun.
Stop davant Cussegl grond
Durant la sessiun d'avust ha la rulotta er fatg fermada davant il Cussegl grond per preschentar ils projects. Cun quest'acziun spera il mainafatschenta da jugend.gr David Pfulg da persvader ils deputads che la promoziun da giuvenils saja ina chaussa impurtanta. Ils blers deputads han laschà plaschair l'idea.
Signal a las vischnancas
Entras la rulotta duain las vischnancas senza purschida vegnir attentas. Ils uffants e giuvenils hajan interess vid occurrenzas sco cuschinar ensemen, emprender da far graffitis ubain er sautar.
Il proxim stopp fa la rulotta a Valendau. Là pon ins visitar ella davent dals 9 da settember enfin l'emprim d'october 2016.