Siglir tar il cuntegn

Chantun Ina vusch unida da Rumantschas e Rumantschs

Johannes Flury, l'anteriur directur da la scol'auta da pedagogia dal Grischun ed anteriur president dal cussegl d’administraziun da l’Institut Otalpin a Ftan duai succeder a Duri Bezzola ch'ha demissiunà suenter be 3 onns en uffizi. El è l’emprim e fin uss unic candidat per quest post.

Johannes Flury
Legenda: Johannes Flury vul daventar il successur da Duri Bezzola tar la Lia Rumantscha. ANR, B. Stecher

Unir ils Rumantschs

Avess Johannes Flury da vegnir il nov president da la Lia Rumantscha, lura vuless el en emprima lingia manar e betg mo esser ina persuna da represchentaziun, sco quai ch’el ha ditg envers RTR. Sper simplifitgar la structura da la Lia Rumantscha vuless el era sustegnair ils Rumantschs en la Bassa e quels che vulan s'integrar, quels ch'han sco el, emprendì rumantsch. La pli gronda sfida vesa el dentant d’unir puspè ils Rumantschs suenter l’entira dispita dal rumantsch grischun.

Emprim betg Rumantsch al timun

Vegn Johannes Flury president, lura è quai en mintga cas in novum. I fiss numnadamein l'emprima giada ch'in betg Rumantsch, in che n’è betg creschì si en ina famiglia rumantscha, mabain ch'ha emprendì rumantsch, timunass la Lia Rumantscha.

Davart la successiun da Duri Bezzola decida la radunanza da delegadas e delegads da la Lia Rumantscha, ils 31 d'october 2015 a Mustér.

RR novitads 12:00