Per cussedentas e cussedents en chasas da tgira en il Grischun n’èsi actualmain betg garantì ch’els survegnian assistenza da suicidi. Tut tenor ston quellas persunas bandunar la chasa da tgira – ed uschia er bandunar l'ambient ch’els enconuschan. Quai cuntrafetschia als dretgs umans.
Perquai pretenda ina incumbensa en il Cussegl grond che tut las chasas da tgira sustegnidas dal chantun duain pussibilitar il suicidi cun assistenza. L’incumbensa vegn dal deputà da Partida socialdemocratica, Pascal Pajic. Ella è vegnida surdada a la regenza.
Regenza vul stgaffir lescha correspundenta
La regenza ha uss communitgà, da vulair stgaffir in nov artitgel che porscha quella pussaivladad. La lescha chantunala duai resguardar las leschas svizras latiers.
Il Cussegl grond decida en ina da las proximas sessiuns, sch’el vul surdar l’incumbensa a la regenza.
