Dapi l'introducziun dal plan d'instrucziun 21 na pon scolars e scolaras da la 3. reala betg pli vegnir dispensads directamain da las scolas da linguas estras obligatoricas. En las regiuns cun linguatg da scola tudestg, desistevan fin là blers scolars dal talian ed en las regiuns talianas blers da l'englais. Talas dumondas da dispensaziun ston uss vegnir tractadas da l'Uffizi chantunal da scola.
Sco la regenza grischuna respunda sin in'incumbensa da la fracziun da la PPS vul ella bain tractar quella dumonda – dentant betg immediat. Ella propona perquai da tractar la responsabladad da talas dispensas en il rom da la proxima revisiun parziala da la lescha da scola.
Preparaziun sin emprendissadi
La fracziun da la PPS aveva argumentà sia incumbensa cun il fatg, ch'i giaja l'ultim onn da scola surtut per preparar scolaras e scolars sin la furmaziun professiunala. Quai stettia en cuntradicziun cun la pratica valaivla, sch'i giaja per dispensar ils scolars da 3. reala d'ina lingua estra e da cumpensar quellas lecziuns cun matematica u lingua principala.
Nagina regla directa
Quella argumentaziun na lascha la regenza dentant betg valair, cunquai ch'i n'haja avant mai dà ina regla directa da cumpensar las lecziuns da lingua estra cun matematica e linguatg da scola. Uschia na saja er betg pussaivel d'evaluar uss, tge effects che la nova regla haja.
En pli hajan ils scolars uss cun il rom d'individualisaziun la pussaivladad da profundar lur enconuschientschas da matematica u lingua da scola. En vista ad in emprendissadi possian tut ils scolars e las scolaras profitar da quai, scriva la regenza.
RR novitads 12:00