Siglir tar il cuntegn
cuntegn

Chantun Indigens pajan da nov per durmir en l'agen mises

Persunas che fan vacanzas en l’atgna abitaziun da vacanzas u mises en il medem vitg nua ch’ellas abiteschan pajan da nov er ina taxa da giasts. La regenza grischuna ha deliberà la missiva per reveder la lescha da las taglias communalas e da baselgia.

Persunas indigenas ston pajar taxa da giasts per pernottar sin mises.
Legenda: Persunas indigenas ston pajar taxa da giasts per pernottar sin mises. Keystone

Cun la pratica actuala na vegnian betg tuts tractads tuttina, avevan decis il Tribunal federal e da la Dretgira administrativa dal chantun Sviz, scriva la regenza grischuna. Tenor questas sentenzias na dependia la pussaivladad da far diever da las purschidas turisticas betg dal lieu da domicil. Uschia dettia quai uss in basegn d’agir era en il chantun Grischun, argumentescha la regenza la decisiun da reveder la lescha.

Lescha chantunala per evitar lavur a las vischnancas

Per evitar che mintga vischnanca stoppia uss adattar la lescha communala da turissem, ha la regenza decis da reveder la lescha chantunala. La soluziun saja en l’interess da las vischnancas e possia era vegnir realisada svelt, scriva la regenza grischuna. Ina excepziun dettia quai, sche la vischnanca paja ina contribuziun essenziala al svilup dal turissem or da las taglias sin las entradas.

Il Cussegl grond tracta il project en la sessiun da december.

RR novitads 10:00