El vesia la revoluziun digitala oravant tut sco ina schanza per las interpresas mesaunas e pitschnas (IMPs) dal Grischun, declera Jon Erni, commember da la direcziun da Microsoft Svizra ed iniziant da «Miaengiadina».
Sfida da chattar persunal adattà
El enconuschia gia oz interpresas che na chattian betg emploiads adattads entaifer il chantun. Grazia ad in internet svelt possian ellas dentant recrutar glieud che lavuria en la Bassa per els. Vitiers vegnia ch‘il martgà daventia mundials tras la digitalisaziun e na saja betg pli mo limità sin il Grischun.
Buna infrastructura da basa è necessaria
Sch‘ils interprendiders veglian profitar da la digitalisaziun saja impurtant d‘avair persunas ch‘enconuschian bain quest tema en lur fatschenta, cusseglia Erni. «Cun quella glieud ston ins discutar intensivamain ed er en ina moda fitg averta.» Per propi profitar optimalmain da la digitalisaziun dovria tenor Erni dentant er ina buna infrastructura da basa. «Latiers tutga sco aua u electricitad er in internet svelt. »
La savida dad ozendi vala en diesch onns sco antiquada.
Scolaziun è centrala
Per ch‘igl entir chantun possia profitar da la revoluziun digitala saja dentant oravant tut la scolaziun centrala. «Nus stuain investir massivamain en la scolaziun da da scoletta fin la scola superiura ed en emprima lingia rinforzar quests roms ch’èn d’impurtanza per la digitalisaziun», declera Erni. Plinavant stoppia la glieud vegnir scolada per adina puspè pudair adattar lur savida.
RR actualitad 08:00