Siglir tar il cuntegn

Header

cuntegn

«Inhaft geschaffen» Nova cumparsa per products da praschuns grischunas

Da nov sa chattan omaduas praschuns chantunalas a Cazas. Ord quest motiv vegnan ussa tut ils products da las praschuns Realta e Cazas Tignez vendidas a moda unitara. Ins ha elavurà ina nova cumparsa che duai dar ina fatscha a l'impurtanta lavur che vegnia fatga en praschun.

Cun la marca «inhaft geschaffen» haja in'agentura da reclama creà ina nova cumparsa per ils products da praschun, scriva l'Uffizi chantunal per l'execuziun giudiziala. Il design mussia per tge che las praschuns grischunas stettian: qualitad, products individuals e creativs, regiunalitad sco era persistenza. Coc da la nova marca saja il messadi ch'ils products na sajan betg producids en libertad. I na duai betg bagatellisar – il num saja cler e sincer che na valiteschia betg ma che stettia per quai ch'i saja propi: «inhaft geschaffen»

prutret d'intgins dals products da la praschun cun si il nov logo.
Legenda: MAD, Uffizi per l'execuziun giudiziala

Lavur da praschuniers saja impurtanta

Il cudesch da dretg penal oblighescha praschuniers da lavurar, quai saja in'impurtanta part per il success d'in chasti penal, scriva l'uffizi. Cun activar entras lavurar vegnian las abilitads socialas e professiunalas dals praschuniers promovidas. Uschia vegnia la schanza sin ina vita senza ulteriurs chastis engrondida. La nova marca dettia ina fatscha a la lavur da praschuniers e la stimaziun ch'ella meritia – quai saja stà in dals giavischs da l'Uffizi per l'execuziun penala.

Ord l'archiv:

Il mars da quest onn han ils praschuniers dal Sennhof a Cuira pudì retrair la nova praschun da Cazas Tignez.

video
Dal Sennhof a Tignez – ina praschun fa midada
Or da Cuntrasts dals 03.03.2020.
laschar ir

RTR novitads 09:00

Artitgels legids il pli savens

Scrollar a sanestra Scrollar a dretga