Avant sis onns han els inoltrà l’iniziativa «per ina chatscha etica e cumpatibla cun la natira». Ils iniziants han duvrà pazienza e stuì recurrer atras tuttas instanzas. Uss suenter la sentenzia dal Tribunal federal èn els cuntents che lur iniziativa è cumplainamain valaivla.
Igl è ina victoria per la libertad d’opiniun e da votar
Ils animals n’hajan nagina vusch sch’i giaja per leschas da chatscha, di Marion Theus. L’iniziativa procuria tranter auter ch’ils animals survegnian ina vusch en ils gremis che decidian davart la chatscha.
La votaziun dal pievel ha probabel lieu pir en la segunda mesadad dal 2021. Ils iniziants ston pia anc ina giada avair pazienza. Ma Marion Theus guarda cun perseveranza sin la votaziun vegninta – era sch’ella sa ch'iniziativas da chatscha n’han betg simpel en il Grischun.
Nus vulain proteger ils animals e nus quintain cun ils Grischuns e las Grischunas.
Politica grischuna survegn ulteriur lavachau da Losanna
La regenza grischuna era stada persuenter da declerar plirs puncts da l’iniziativa nunvalaivels. Tuttina na saja la sentenzia da Losanna nagina surpraisa, di Mario Cavigelli, cusseglier guvernativ responsabel. Era l’iniziativa cunter la chatscha speziala aveva il Tribunal federal gia declerà sco valaivla, cuntrari a la politica grischuna.
Perquai midia la regenza en l'avegnir sia pratica da giuditgar la valaivladad dad iniziativas popularas.
Pertutgant il cuntegn da l’iniziativa per ina chatscha etica s’exprima Mario Cavigelli a moda critica. En plirs puncts saja l’iniziativa cumparegliabla cun l’iniziativa cunter la chatscha speziala. Ella giaja dentant anc pli lunsch:
Il sajet cunter la chatscha è tar questa iniziativa pli fundamental
