Siglir tar il cuntegn

Header

video
Taglia d’ierta – ils arguments d’adversaris ed aderents
Or da Actualitad video dals 27.05.2015.
laschar ir
cuntegn

Chantun Iniziativa davart la taglia sin l’ierta – pro e contra

Ils 14 da zercladur decida il suveran sur da l’iniziativa davart la taglia sin l’ierta. L’iniziativa vul ch’ils ertavels vessan da pajar 20 % taglia sin iertas sur dus milliuns francs.

Excepziuns duessi tranter auter dar sch’i va per ertar fatschentas e bains purils ni er sch’ina fundaziun d’utilitad publica erta ils daners. Dus terz da las entradas da la taglia sin l’ierta giess a l’AVS. In terz giess als chantuns.

Ils arguments dals iniziants:

  • La taglia sin l’ierta gida a finanziar l’AVS
  • Cun la taglia sin l’ierta èsi pussaivel d’egualisar almain in zic la repartiziun da la facultad en Svizra. Il mument possedan 2% da la populaziun tant sco ils ulteriurs 98%.
  • La taglia sin l’ierta è gista perquai ch’ils ertavels n’han betg lavurà per l’ierta.
  • Ertavels dad ertas pitschnas e mesaunas na ston betg pajar taglia.
  • L’erta dal partenari u da la partenaria n’è betg pertutgada da la taglia.
  • Tar ertas dad interpresas e manaschis agriculs dessi reducziuns.

Ils arguments dals adversaris :

  • Ils chantuns na dastgan betg pli decider sez davart la taglia sin l’ierta.
  • I n’è betg definì en il text d’iniziativa fin a tge summa ch’ins na pajass betg taglia per ertar in’interpresa. Uschia pudessan interpresas pitschnas e mesaunas esser periclitadas.
  • Tut tenor tgeninas e quant grondas che las excepziuns èn, avessan ils chantuns pli pauc entradas da taglia. Sco consequenza savessi dar in auzament d’autras taglias per tuts.
  • Cun iertas da 2 milliuns francs che na fissan betg pertutgadas da la taglia pudessan er glieud da la classa mesauna stuair pajar taglia sch’els ertan p. ex. ina chasa ubain ina interpresa.
  • Igl è gia vegnì pajà ina giada taglia sin las ertas, numnadamain mintg’onn sco taglia sin entradas e sin la facultad.
  • Pertutgadas da la taglia sin l’ierta fissan er donaziuns enavos fin l’onn 2012. Quai purtass tant al stadi sco a pertutgads gronda lavur administrativa.

Quai èn arguments dal deputà dal Cussegl grond Jon Pult per l’iniziativa e dal cusseglier dals chantuns Stefan Engler ch’è cunter l’iniziativa.

Artitgels legids il pli savens

Scrollar a sanestra Scrollar a dretga