L'inspectur da scola Alexi Nay è cuntent, che l'onn è fin. Il coronavirus resta dentant anc in tema tar l'inspecturat. Per exempel saja pussibel, ch'i vegnia a dar mesiras spezialas per singulas scolas, sch'i dat intgins cas da covid-19 en ina scola. Talas eventualitads vegnian anc discuttadas tranter las inspecturas ed inspecturs.
Plus tar digitalisaziun e contact
Durant la fasa cun instrucziun a distanza han ins er fatg experientschas, ch'i renda da mantegnair vinavant, manegia Alexi Nay. Dad ina vart haja la magistraglia – malgrà distanza – gì dapli contact cun ils geniturs. Ils geniturs hajan survegnì in'envista da la scola. Quai haja gidà da chapir la chapientscha vicendaivla.
Vinavant hajan intginas scolas fatg in pass vinavant cun ils meds d'instrucziun digitals. Surtut las scolas, che n'hajan fin uss anc betg nizzegià uschè intensiv quell'infrastructura hajan fatg gronds pass. L'inspectur da scola Alexi Nay spera che quels meds vegnan er suenter nizzegiads pli savens. Remplazzar dal tut l'instrucziun da preschientscha na possia l'emprender sin distanza dentant betg.