Iris Riatsch ha persvadì la giuria ed il public. Suenter l’emissiun ha la victura festivà l’emprim cun sia famiglia e lura era cun las autras nov participantas ord otg chantuns da la Svizra. Ella ha ditg, ch'i saja stà in’atmosfera fitg collegiala. Per ella saja dentant impurtant da na betg survalitar il titel gudagnà. Las autras participantas avessan era gì merità el.
Menu improvisà: Veschlas
En l’emprima runda han las participantas gì 25 minutas temp da cuschinar in menu ord ingredienzas prescrittas. Iris Riatsch ha alura fatg sut pressiun da temp veschlas da legums tar in toc charn vadè. Grazia a quai menu ha ella dumagnà en la segunda runda nua ch'i ha dà in quiz.
Giubileum da diesch onns
Dapi diesch onns datti l’emissiun «SRF bi de Lüt». Ils 14 da schaner 2017 èn tut las victuras dals onns passads vegnidas ensemen per tscherner la meglra da las meglras. Il spitachel in pau pli spezial, è vegnì emess live ord la Bodensee-Arena a Kreuzlingen. En il final èn stadas dasper la victura grischuna er Annemarie Eberle e Romana Zumbühl. Il public ha decis via «televoting».
Gudagnà la novavla ediziun da «Landfrauenküche» il 2015
Ad Iris Riatsch n’èsi mai ì per gudagnar il titel en quella concurrenza da cuschinar. Ella è sa participada lezza giada cun la finamira da mussar la tradiziun da la cuschina engiadinaisa. La mamma e nona dat gugent ses agen «pepp» als recepts tradiziunals. Ses capuns serva ella il pli gugent cun ina sosa da murachels. A Vnà, sin 1'600 meters sur mar, tgira Iris Riatsch in grond iert. Da là deriva quasi tut quai ch’ella dovra per cuschinar. Il rest deriva dal bain puril biologic da ses figl Fadri. Ses um Domenic è chatschader. Cun ses biadis realisescha ella in project tut spezial. Cun mintgin creescha ella in cudesch da cuschinar. Per uschia dar vinavant la tradiziun da las spezialitads grischunas a la proxima generaziun.
RR actualitad 06:00++
