Siglir tar il cuntegn

Header

Gasetta
Legenda: La «Südostschweiz» Keystone
cuntegn

Istorgia da medias 220 onns pressa da Cuira

La «Churer Zeitung» era l'emprima gasetta da Cuira. Ina gasetta che vegniva edida duas giadas l'emna. Da quel temp vegniva fatga tut la lavur dad ina persuna suletta. L'editur era er il redactur e fascheva er il layout da l'entira gasetta.

Enfin oz èn vegnids edids 26 differents titels da gasettas da Cuira. Las gasettas da pli baud eran savens politicas e cun leger quellas badavan ins svelt da tge partida che la gasetta era. Bunamain mintga partida aveva in'atgna gasetta. Pervia da problems finanzials èn bleras gasettas lura er svelt puspè svanidas u han fusiunà cun autras.

La libertad dals schurnalists è sa midada

Ma na be la variaziun da la pressa da Cuira è sa midada durant ils ultims 220 onns. Era la lavur schurnalistica è sa midada fermamain. L'istoricher Hansmartin Schmid è da la vis, che la libertad dals schurnalists era pli baud pli gronda. Ins saveva scriver sur da tut, oz èn ils schurnalists en lur spartas e na scrivan sur da nagut auter.

Dus tschientaners datti gia la pressa da Cuira. Sche quella surviva anc ina giada 200 onns na sappian ins betg dir. Da quella opiniun èn Hansmartin Schmid sco era Hanspeter Lebrument, editur da la Somedia. Entant che las gasettas porschan insatge che autras medias na san betg, survivian las gasettas er.

Anc duas gasettas quotidianas en Grischun

Suenter 200 onns èn uss anc restadas duas gasettas quotidianas tudestgas en Grischun. Entant che tuttas duas han avunda lecturs na veglian ins betg fusiunar, uschia Hanspeter Lebrument. Per el èsi cler, il futur per las gasettas Grischunas vesa ora bain.

RTR actualitad 17.00

Artitgels legids il pli savens

Scrollar a sanestra Scrollar a dretga