Siglir tar il cuntegn

Chantun «Jau hai savì ch'igl è capità insatge nausch»

Betg lunsch davent dal lieu da disgrazia al Piz Segnas è la chamona dal pass Segnas. Er il guardiachamona Rainer Feldner è stà preschent cura che la Ju-52 è crudada.

La Ju-52 ch' è crudada al Piz dal Segnas.
Legenda: L'emprim tunava quai sco sche tut fiss en urden e lura hai dà in schlop, uschia Rainer Feldner. MAD, Polizia chantunala

Dus gidanters da ses team eran gist sin il pass, cura che l'accident è capità, declera Rainer Feldner. Tals hajan vis tut. «Jau sez sa chattava en la chamona. Nus avain udì co l'aviun e sgulà pli datiers. Era ils motors tunavan – tut era normal.» Tuttenina haja lura dà in grond schlop.

L'emprim ils motors, lura il schlop e suenter in ruauss absolut. Jau hai savì ch'igl è capita insatge nausch.
Autur: Rainer Feldnerguardiachamona

La sonda vargada era la chamona occupada cumplettamain cun 15 osps. Era tals eran consternads. Tuts eran schoccads, trais dad els sajan perditgas ch'han vis datiers tge ch'è capità, uschia il guardiachamona.

Perditgas han fatg maletgs avant crudada

Ensemen cun quatter medis è Rainer Feldner immediat currì envers il vrac ed ha alarmà las forzas da salvament. Silsuenter han las perditgas gì da respunder dumondas da l'examinaziun d'accidents d'aviun e da la polizia. Las duas perditgas dal team da la chamona sajan danovamain vegnidas sguladas giu Flem per in'interrogaziun ed in protocol. «Els han anc fatg maletgs avant la crudada. Tals vul l'examinaziun d'accidents d'aviaziun sa chapescha vesair.»

El saja schoccà, consternà, trist ed emprovia d'ir enturn cun quai ch'è capita, explitgescha Rainer Feldner. Gist perquai han las perditgas survegnì in numer da telefon dal care team, ch'è per il mument anc staziunà a Flem.

RR actualitad 17:00