Siglir tar il cuntegn

Header

cuntegn

Chantun «Jau pos viver mes siemi da mat»

Cura ch'el era vegnì tschernì sco directur da la Viafier retica ha Renato Fasciati ditg ch'in siemi da mat giaja en vigur. Ussa, 100 dis pli tard, possia el viver quest siemi. El lavuria cun gust e plaschair per la pitschna cotschna.

El saja in da trens e quai cun pel ed ossa. Perquai saja l'unica chaussa che disturbi el vid ses nov biro ch'el na vesi betg ils trens. Il biro da Renato Fasciati è en l'edifizi da la Retica amez la citad da Cuira.

Renato Fasciati haja surpendì ina organisaziun cun collavuraturs motivads che s'identificheschian fermamain cun la Retica. Quai saja la meglra basa per lavurar.

audio
Ils emprims 100 dis da Renato Fasciati sco directur da la Viafier Retica
ord Actualitad dals 19.09.2016.
laschar ir. Durada: 3 minutas 26 Secundas.

Pliras sfidas spetgan

Per manar cun success il tren grischun detta quai però intginas sfidas. Dasper il grond plazzal dal nov tunnel da l'Alvra saja quai da sanar e renovar la rait cun tut ils tunnels e las punts. Ed i saja dad augmentar las cifras da passaschiers ch'èn sa sbassadas ils ultims onns.

Nus stuain cuntanscher novs martgads sco per exempel turists dal di da Turitg.
Autur: Renato Fasciati Directur Viafier retica

Ina mesira per quai saja da crear novas purschidas e da vender quellas meglier. In'autra da far pli attractiv ils viadis sez.

E lura stoppian era ils trens vegnir modernisads. Blers sajan enturn 30 onns vegls e stoppian ussa vegnir remplazzads. Uschia ha Renato Fasciati gia pudì pustar 27 novs trens per 320 milliuns francs. Ulteriurs vegnian a seguir.

RR actualitad 17:00

Artitgels legids il pli savens