Siglir tar il cuntegn

Header

Siemis.
Legenda: Sch'ins vul chattar la muntada dals siemis èsi da chattar parallelas en la vita reala. Pixabay.
cuntegn

Kino en il chau Tge ch'ils siemis ans vulan dir en la sien

Blers da nus siemian. Quai pon esser siemis normals, siemis curius u schizunt siemis nauschs. Tut quels pon avair ina muntada, sch’ins sa fatschenta intensivamain cun els.

Margarethe Letzel è psicoterapeuta ed ha sia atgna pratica en la citad da Lucerna. Pli baud ha ella lavurà blers onns sco cussegliadra tar ina gasetta naziunala ed è vegnida confruntada dals lecturs cun dumondas davart la muntada dals siemis. Dapi lura è ella sa profundada en quest tema pli spezial ed ha schizunt scrit in cudesch davart las muntadas dals siemis.

Ils siemis èn individuals e persunals

La psicoterapeuta declera ch’ins na possia betg explitgar sez ils siemis cun differents lexicons da simbols. «Sch’ins perda il tren en il siemi lura munta quai tenor il lexicon, ch’ins ha manchentà ina gronda schanza. Dentant poi gea esser ch’ins ha forsa gnanc chattà il dretg binari dal tren. Quai po esser dal tuttafatg in’autra situaziun da partenza per chattar la muntada dal siemi.»

Margarethe Letzel.
Legenda: Margarethe Letzel è psicoterapeuta a Lucerna. Ella ha scrit in cudesch davart las muntadas dals siemis. RTR, Lukas Quinter.

Ils siemis èn products ord impressiuns che nus faschain mintgadi. Durant la sien ha il tscharvè temp dad elavurar las impressiuns e furma pervi da quai differents maletgs en noss chau. Pervia da quai na san ins betg pauschalisar ils siemis.

Ils siemis èn ina funtauna per ideas e patratgs creativs
Autur: Margarethe Letzelpsicoterapeuta

Per chattar la vaira muntada cusseglia Margarethe Letzel sco emprim da scriver si il siemi e da guardar sin piculezzas sco per exempel: Tge è stà spezial? Tge ha fatg tema a mai? e Tge è stà il pli impressiunant? Silsuenter èsi da mirar, sch’i dat parallelas en la realitad che gidan da chattar la muntada.

Siemis nauschs èn in clom da sveglia

Margarethe Letzel è da l'opiniun che siemis nauschs sajan in ferm indizi per situaziuns che disturban nus actualmain. Quai pon esser dumondas impurtantas sin las qualas ins n'haja anc betg chattà ina resposta. Cunzunt sch’ins è confruntà cun situaziuns, nua ch'ins è surdumandà, lura sajan siemis nauschs pussaivels.

RR actualitad 08:00